KUALA LUMPUR, 23 Jun: Menteri Komunikasyen Datuk Fahmi Fadzil madah, Kaunsil Media Malaysia endang pantar pemadu manah ngatur isu bekaul enggau etika pemberita.
Ku terang iya, nya nyengkaum pengawa mantai infografik pasal pengawa nyiri Kepala Polis Menua Datuk Seri Mohd Khalid Ismail ari sebuah surat kabar lokal apin lama ke udah.
“Aku endang chukup tekenyit enggau berita siti infografik ti enda betul, amat enda betul, laban aku enda kala meda Datuk Seri Khalid ba sebarang achara, aum, konvensyen tauka kongres parti.
“Nyadi, tu siti pekara petenah ba aku chukup enda manah.
Tang ba aku dalam penyadi ke baka tu Kaunsil Media endang pantar pemadu manah endur kitai ngatur isu-isu nyengkaum pekara etika pemberita baka ke udah diterangka,” ku iya.
Fahmi mansutka jaku nya pengudah bejadika Karnival Kita MADANI renggat Wilayah Persekutuan Kuala Lumpur enggau Putrajaya di IWK Eco Park, Lembah Pantai kemari.
Empai lama ke udah, siti surat kabar lokal mantaika infografik biodata Datuk Seri Mohd Khalid ti madahka iya kala mangku pengawa tinggi dalam Parti Keadilan Rakyat (PKR).
Taja pia, surat kabar nya udah batak turun infografik nya lalu udah minta ampun sechara tebuka.-TVS
