KUALA LUMPUR, 22 Jun: Polis Diraja Malaysia (PDRM) ngenuku ke Kepala Polis Menua ke baru Datuk Seri Mohd Khalid Ismail sigi enda kala nyadi kaban tauka mangku sebarang pangku pengawa dalam sebarang parti politik.
Sekretari PDRM Datuk Kamaruzaman Abdullah madah raban sida berati berat penyalah berita ke ayan ba sebuah surat kabar empai lama ke ngaitka Mohd Khalid enggau sebuah parti politik.
“Penerang nya kebendar enda betul, ngasuh saru enggau ngujungka peragam ke salah sereta ngujungka penanggi ngagai kredibiliti raban pengelikun menua.
“PDRM mega ngerara pengilap media nya dalam mantaika penerang ke nadai dulu diperesa manah lalu udha ngerajaika rikod tim sereta sesiku orang,” ku iya nengah sebengkah penerang ditu, sehari tu tadi.
Iya madah etika pemberita mesti dititih genap berita ke diayan mesti dulu ditisih fakta, proses peresa silang enggau ngembuan integriti maya nulis.
Kamaruzaman mega nyemetak madahka tim nya bediri atas pugu neutraliti, integriti enggau profesionalisme.
Nya kebuah PDRM sigi enda ngelakka sebarang pengawa ke ulih ngeruga pengarap rayat ngagai raban sida.
“PDRM mengkang komited bejalaika pangku pengawa nyaga pengelikun menua enggau nyaga pengelantang mensia mayuh,” ku iya.-TVS
