KUCHING, 22 Jun: Pengerami Gawai Dayak Renggat Nengeri Sarawak 2025 deka nutup tirai malam tu lalu sepanjai udah diatur kenyau 15 Mei ke udah, semua rayat Bumi Kenyalang tentu ngasaika penyelai enggau pemanah budaya bansa Dayak ke udah dipandang sekumbang musin Gawai tu.
Taja dunya majak moden, Sapit Menteri Ba Opis Premier Sarawak (Pengereja Pengawa, Imigresen enggau Pematau Projek) ke mega Chairman Komiti Pengatur Gawai Dayak taun tu, Datuk Gerawat Gala andal identiti budaya sereta adat Gawai nya meruan tegap sereta idup lalu mesti dijaga manah awakka enda lenyau ngapa.
“Suba pengerami Gawai tu diatir ba renggat rumah panjai, tang diatu iya diatur ba renggat nengeri lalu tu nyadi siti pemansang ke manah sereta ngemegah ukai semina ngagai bansa Dayak, tang semua rayat di Sarawak.
“Nengah pengerami Gawai tu, kitai ngarapka ulih ngaga jematan ke ukai semina meretika enggau nerima sechara tebuka bida adat enggau mega budaya kitai lalu penyelai tu ti deka kitai jaga di nengeri Sarawak tu.
“Penyerakup dalam mayuh leman,” ku iya.
Iya mansutka pekara nya ngagai TVS maya penyikap kepenudi Pengerami Makai Lemai Gawai Dayak 2025 ba Palan Konvensyen Borneo Kuching (BCCK) sehari tu tadi.
Udah nya, Sapit Menteri Utiliti enggau Telekomunikasi Sarawak, Datuk Liwan Lagang ngasaika pengerami Gawai Dayak nyadi jematan penyambung antara rebak dulu enggau rebak baru lalu pengawa ngatur mayuh aktiviti nyerumba pengerami Gawai Dayak taun tu, nyengkaum Pengerami Makai Lemai Gawai Dayak 2025 endang antara atur dikena ngerami mayuh bansa di Sarawak lalu berebak enggau nya dikena ngangkat enggau negapka agi inklusiviti baka ke udah disebut dalam Strategi Pemansang Pasca Covid-19 (PCDS) 2030 Sarawak.
“Taun tu kitai ngempuruka atur chara lama pengawa ngatur pengerami tu nengah chara ngemasukka elemen digital baru.
“Enti diperati ari sukut dekorasi ke bisi ba tiang pengias, bisi elemen konvensional, udah nya ba pintu penama sereta ngelinggi kitai nepu seni digital ke mandangka bemacham leman bansa ke bisi dalam FORUM tu.
“Kami deka mandang taja bansa Orang Ulu tu diau ba kandang menua pesisir, sida mega nemu pekara pemansang teknologi digital,” ku iya.
Pengerami Gawai Dayak Renggat Nengeri Sarawak 2025 endang program diatur kunsi Perintah Sarawak enggau Gempung Besai Serakup Orang Ulu Malaysia (FORUM) ke nyadi pugu pengatur pengerami serak tu.
Bemacham program udah diatur nyengkaum Bazar Gawai Dayak di MJC Batu Kawa, Karnival Gawai Tradisi di Begunan Forum, Miri sereta Pengawa Bejalai Bebala Mayuh Niti Daun Gawai Dayak 2025 ba Tebing Sungai Kuching (kemari).
Nya alai, Pengerami Makai Lemai Gawai Dayak 2025 ba BCCK malam tu endang penutup Pengerami Gawai Dayak Renggat Nengeri Sarawak 2025 lalu deka dirichahka enggau penatai Menteri Besai, Datuk Seri Anwar Ibrahim sereta Tuai Pemegai Menua (TYT ) Nengeri Sarawak, Tun Pehin Sri Dr Wan Junaidi Tuanku Jaafar.-TVS
