KUCHING, 20 Jun : Sebuah galeri enggau indu opis Kaunsil Krafjari Sarawak (SCC) ke baru deka digaga ditu, ku Menteri Dagang Temuai, Industri Kreatif enggau Seni Pemerindang Sarawak Datuk Seri Abdul Karim Rahman Hamzah.
Iya madah, perintah nengeri udah ngelala bagi endur taba projek nya di belakang Kuil Gurdwara Sahib Sikh enda jauh ari Muzium Budaya Borneo ditu, lalu perambu nya udah dibantai ngagai Premier Sarawak Tan Sri Abang Johari Tun Openg.
“Diatu kitai dalam proses ngulihka tanah. Semua taba pemesai dua ikar (0.8 hektar) nya deka dikena nirika opis enggau galeri Kaunsil Kraf Sarawak, nya deka nyadi palan aktiviti.
“Sebuah stesyen Autonomous Rapid Transit (ART) deka bisi semak nya, lalu temuai ti ngusung muzium mega ulih meli kraf dedin.
“Projek tu dipelaba ngambi awak pengelama dua taun endur tembu,” ku iya nengah sebengkah aum media pengudah betuaika Aum Kaunsil Krafjari Sarawak sehari tu tadi.-TVS
