KUCHING, 19 Jun : Universiti Malaysia Sarawak (UNIMAS) ngerikodka japai ti chukup ngemegah ba Penuduk Impak Times Higher Education (THE) 2025, iya nya ba penuduk gerup 101-200 ba renggat dunya.
Nengah sebengkah penerang sehari tu tadi, UNIMAS madah, pemujur ke baka nya dijapai kenyau 2023 nyereminka pengulih universiti nya nyeririska strategi institusi sida enggau Juluk Pemansang Meruan (SDG) Serakup Gempung Bansa (PBB).
“Ari penuduk 401-600 taun 2023, UNIMAS niki ngagai penuduk gerup 301-400 ba taun udah nya, sebedau ke niki lebih manah taun tu.
“Japai tu diperansang enggau atur bepelasarka bukti, pengawa matau bestruktur enggau pengawa tegap dalam meri pangka meruan nengah pansik, pengawa ngajar sereta servis komuniti,” ku iya.
‘THE Impact Rankings 2025’ ngeletak rikod universiti ba selampur dunya bepelasarka bantu sida ngagai SDG. Beratika empas universiti di selampur dunya bepelasarka japai sida dalam SDG.
Ungkup edisyen 2025, 2,526 universiti ari selampur dunya udah dirintai.-TVS
