SIBU, 16 Jun: Polis mujur ngemuntanka pengawa sindiket ngidar dadah ba kandang mengeri Sibu iya nya ngerampas bemacham bansa dadah enggau reta ti berega lebih RM8.5 juta nengah pengawa ngerap ba tiga bengkah endur ditu kena 12 enggau 13 Jun tu tadi.
Komisioner Polis Sarawak Datuk Mancha Ata madahka, operasyen Begian Tasat Jenayah Narkotik Indu Opis Polis Pelilih (IPD) Sibu ngaul pengawa ngerap ba sebuah palan dagang di Palan Pedada enggau dua buah rumah teres di Lorong Permai Jaya ti ngujungka siku lelaki beumur 52 taun enggau indu beumur 44 taun ditan.
“Asil ari pengawa meresa nya, polis mujur ngerampas dadah ke dipelaba bansa syabu pemerat 7,086.7 gram (g), ketamin 2,078.9g enggau 2,022.6g pil Erimin 5 ke dianggarka berega RM532,934.40,” ku iya.
Iya nerangka dadah ke dirampas nya ungkup dijual ba makit lokal lalu pengawa ngerampas nya siti pemujur besai ba pengawa nagang ngidar barang ke nadai pemendar di nengeri tu.
Kelimpah ari dadah, raban polis mega ngerampas mayuh macham reta tengkira nyengkaum mata duit penyampau RM5.16 juta, empat jongkong emas, dua marik emas, tiga jam Rolex enggau tiga buah entukar mar ti dipelabaka enggi sindiket nya ke berega penyampau RM7.99 jut lalu nyadika nya siti pengawa ngerampas pemadu besai di Sarawak.
“Penyampau semua rega dadah enggau aset ke dirampas manggai RM8.53 juta. Bela dirampas iya nya sekeda kad bank, kunchi enggau perengka dikena mungkus dadah,” ku iya nengah aum media sehari tu tadi.
Ku iya agi, asil pansik tumu tetemuka kededua saspek nya dipelabaka nyadi pengidar besai sindiket nya ke udah aktif bejalaika pengawa kenyau ari taun 2015 nengah chara ngulihka bekal ari Semenanjung Malaysia ngena servis kurier sebedau ngagihka nya ngelingi mengeri Sibu.
“Peresa ai kemi seduai mandangka pemutus negatif lalu seduai mega nadai ngembuan rikod jenayah,” ku iya.
Tandu iya, kedua-dua saspek diatu ditan riman pengelama tujuh hari berengkah ari 13 nyentuk 20 Jun tu dikena mantu tasat ba baruh Seksyen 39B Akta Dadah Berbahaya 1952.
Ku Mancha madah, Opis Tasat Jenayah Narkotik (JSJN) diatu benung chakah nyidi teda pengawa sindiket tu lalu minta mensia mayuh ke bisi penerang bekaul tau betanya betelefon ngagai hotline JSJN ba lumur 012-2087222.
Aum media nya mega bela digulu Tuai JSJN Sarawak ACP Mustafa Kamal Gani Abdullah enggau Tuai Polis Pelilih Sibu ACP Zulkipli Suhaili.-TVS
