KUCHING, 16 Jun: Dalam komuniti bansa Iban, ngepan ukai semina gari tauka pekayan ke dikena nutup tubuh tang ngembuan reti ke besai ti nyadi kelai budaya, semangat enggau pemagas indu Iban.
Seraya nitihka arus pemansang, bisi cherita lama ti ngayanka pemanah lanting budaya enggau semangat indu Iban.
Siti ari cherita ke agi mengkang dikenang iya nya cherita Rather Edward Nanta, siku indu ke mai gelar Kumang Gawai Miri ba taun 1970.
Diatu, Rather udah manggai umur 70 taun, tang cherita iya mengkang dikeingat dalam sejarah komuniti Dayak di Sarawak lebih agi di Miri.
Ukai semina ketegal ngembuan pemajik enggau pemintar, tang pemanah enggau penyelai Ngepan Kuas ti dikena iya maya bepekit suba ngujungka iya narit ati mensia mayuh.
Ku iya madah Ngepan Kuas ti dikena iya maya bepekit suba diatu udah manggai lebih 100 taun lalu agi mengkang disimpan nyentuk ke sehari tu.
“Ngepan Kuas ke dikena aku maya nya sigi benang emas kelia ti diguna orang ngadu ngepan tu. Engka nya siti pekara ti ngasuh orang tetarit ati enggau Ngepan Kuas ti dikena aku maya bepekit seraya ngepan ke dikena aku nya enda sebaka enggau ngepan pemekit bukai.
“Nyadi, ngepan ke dikena aku nya sigi dipeturun ari kelia. Orang kelia betenun utai nya ngena ubung emas sereta tulin. Diatu, ngepan nya udah manggai 100 taun lalu agi disimpan nyentuk ke sehari tu,” ku iya.
Dalam taun 1970, beserimbai enggau pengerami Gawai Dayak di Miri, raban pengatur ngatur pekit Kumang Gawai iya nya pekit pemajik indu Iban.
Indu dara ke agi beumur 15 taun maya nya, enchabar diri ngambi bagi ba pekit nya, siti singkang ke berani ungkup siku nembiak indu ke agi biak baka iya.
“Lebuh aku enggau bepekit kelia, sida aki aku (Aki Nanta) ke nganjung aku enggau bepekit. Nya entara siti kebuah aku deka enggau pekit tu laban diperansang sida.
“Aku mega rindu meda orang bepekit sereta bekenaka ngepan ti chukup badas. Nya alai, aku nguji nasit diri deka enggau Pekit Kumang Miri 1970,” ku iya.
Pekara ti narit ati lebuh iya bepekit ukai semina ketegal gamal iya ti tampak mua baka bulan pegari, tang pekayan asal Ngepan Kuas ti dikena iya ti chukup badas.
Diias ngena Baju Kuas, Sugu Tinggi enggau kain Kebat, pemajik indu asal ari Tawang, Sri Aman maya nya ngujungka iya mai gelar Kumang Gawai Miri 1970.
“Aku enda nyangka bulih lumur satu, enda nyangka bulih nyadi Kumang Gawai taun 1970 sereta enda nyangka nerima mangkuk besai (trofi) nya laban aku entara pemekit ke pemadu biak maya nya.
“Udah aku dikangau orang nerima gelar nya tadi, aku berasai gaga seraya orang ba baruh panggau meda aku megai (trofi pirak) besai enggau berat maya nya,” ku iya.
Pengudah dichiri nyadi Kumang Gawai Miri 1970, diatu genap 55 taun Rather nyadi ikon ngagai indu dara Iban di pelilih menua Miri.
Kenu ku Rather, peneleba nya ukai semina bekaul enggau pekit tauka ngulihka gelar aja tang lebih agi bekaul enggau peluang meri kelala budaya Iban ngagai mensia mayuh.
Nya alai, iya ngarapka main asal bansa Iban mesti dijaga sereta ditanka ngambika meruan dipeda jemah ila.
“Aku ngarapka main asal kitai Iban enda ditinggalka kitai. Ambika chunto, sida ke laki enggau indu mesti nemu main asal baka ngajat enggau ke bukai ngambika nembiak rebak baru ulih meda sereta ngerinduka main asal kitai Iban,” ku iya.
Cherita Rather Edward Nanta, ukai semina cherita siku indu Kumang Gawai aja tang nyadika kelai pengering, pemerani enggau pengerindu ke budaya.
Pesaka asal baka Ngepan Kuas enggau cherita Kumang Gawai 1970 nyadika peransang ngagai nembiak rebak baru bansa Iban ngambika terus temegah ati enggau identiti diri sereta seruran ngetanka lanting budaya ti udah ditan ngelama tu.-TVS
