BINTULU, 14 Jun: Kaban Parlimen Bintulu, Datuk Seri Tiong King Sing nyemetak madahka, pengelantang enggau pemaik perayat di Bintulu enggau endur bukai ti ba baruh pegai iya terus dikenatika, taja pan megai pangku pengawa menteri penuh dalam kabinet Perintah Besai.
Iya ke mega Menteri Dagang Temuai, Seni enggau Budaya madahka, raban sida senaka ulih mutarka isu projek laun tembu ngaul beberapa projek baka nyeruri rumah panjai, ngemanahka perengka guna sereta laun meri agih tauka turu.
“Aku empu ngaku engka bisi sekeda isu tauka penanggul bukai bedau teputar penuh,” ku iya.
Iya mansutka jaku nya rambau ngulu Program Makai Malam Ngiling Bidai 2025 ti diatur ba sebuah restoren tebilang ditu ensana.
King Sing minta bala rayat terus meri pengandal ngagai raban iya ulih mutarka semua pekara nya sechara berenggat.
“Bisi sekeda projek udah dikemendarka, bisi sekeda benung dalam proses digaga sereta bisi benung ba dalam lis kami ngambika ulih lengkas dipejalaika,” tandu iya.
Kelimpah ari nya, iya madahka bala sida benung nusun baru projek ke patut diberi perati dulu dikena nentuka semua pemansang projek lanchar sereta meri pemaik ngagai rayat.
“Enggau penemu ensuruk, aku minta bala mayuh meri peluang ngagai kami bejalaika pengawa ke patut.
“Enti bisi penanggul, terus madah ngagai aku empu tauka raban aku ke bukai,” tambah iya. – TVS
