BALAI RINGIN, 14 Jun: Konteks pengerami Gawai jeman diatu iya nya nyadi siti pelasar dikena negapka identiti enggau mantaika seni, budaya, jaku, pemakai tradisional sereta ulah ke manah komuniti Dayak di Sarawak ngagai rebak baru enggau mensia mayuh ti datai ari mayuh macham renggat.
Kaban Parlimen Sri Aman, Dato Sri Doris Sophia Brodie madahka, penyerakup rayat pupu bansa enggau jalai pengarap nyadi pugu penegap enggau pemansang di Sarawak enggau Malaysia.
“Nya alai, pengerami Gawai endang besai reti dikena ngerapitka kaul kitai enggau pangan diri, ukai semina ngaul komuniti Dayak aja, tang mega komuniti bukai ti nyadi pemanah sereta ngayanka pengulih terima kitai ti ngemeranka pemaik enggau pengelantang begulai sama,” ku iya.
Jaku Doris nya dibacha Sekretari Politik ngagai Premier Sarawak Dato Peter Nyomek, rambau ngulu Program Makai Lemai Bejadika Hari Seni enggau Budaya Gawai Dayak Balai Ringin 2025 ke diatur Gerempung Veteran Soldadu Pampang Balai Ringin, kemari.
Beduduk enggau nya, Doris ngelalau komuniti Dayak ngerami Gawai ukai semina deka ngatur pengawa makai, ngirup, tauka mantaika main asal baka ngajat sereta ngena pekayan tradisional aja, tang Gawai patut nyadi kelai ulah penuh basa, lanting basa sereta ngayanka penegut penyerakup komuniti Dayak di wilayah tu.
Pengerami nya mega dirichahka enggau pekit kugiran tauka ‘Battle Of The Band’ ti dipasuk lima raban.
Berebak enggau nya, Doris bisi ngungkupka geran sepenyampau RM10,000 ngagai Gerempung Veteran Soldadu Pampang Balai Ringin nyadika kelai sukung iya ngagai gerempung nya. – TVS
