MIRI, 13 Jun: Projek pemansang enggau peminta ti dirandaka komuniti Penan di Long Lobang, Ulu Tinjar, Baram terus dikenatika perintah Sarawak.
Sapit Menteri ba Opis Premier Sarawak (Pengereja Pengawa, Imigresyen, Matau Projek), Datuk Gerawat Gala madahka, naka diatu genturung pendiau dia udah nerima bekal karan 24 jam enggau bungkur arus telekomunikasyen.
“Long Lobang iya nya genturung pendiau Penan ba baruh administrasyen Opis Pelilih Mit Bario begulai enggau Pa Tik enggau Medamut,” ku iya nengah sebengkah penerang kemari.
Gerawat ke mega Kaban Kunsil Nengeri (ADUN) Mulu nerangka, bisi sekeda pengani minta projek nukar atap rumah ngaul 23 pintu laban atap lama sida udah tuduh.
“Bisi mega sebuah rumah begunaka fasiliti servis perubat Lutur Terebai tauka ‘Flying Doctor’,” terang iya.
Taja pia, iya bisi nyebut pasal pemar ke ditapi sekeda raban deka mai tauka ngangkut kereban dikena berumah kia laban Long Lobang ti nadai akses jalai sereta jauh di menua ulu.
Nya alai, iya madahka diri senaka ulih mantu mutarka penanggul nya ngambika projek pemansang ti dipinta perayat lokal dia ulih dirumban.
Pengerembai bukai, Gerawat bisi ngulu licha meri penerang matau projek ari Opis Kereja Raya (JKR) Sarawak enggau Agensi Pemansang Tanah Tinggi (HDA).
“Semua projek ti dipejalaika ba baruh HDA mesti tembu nitigka timpuh ke udah ditetapka, seraya meri pemaik ngagai rayat,” ku iya. – TVS
