PEMANAH enggau pengaya seni kraf tekstil Sarawak dipandangka ngagai raban pemekuh industri beserimbai enggau program ngerembaika penemu, Wacana Kraf 2025 – “Keunikan Kraf Tekstil Sarawak’ ti diatur ba Muzium Budaya Borneo kena 11 Jun 2025 tu tadi.
Kraftangan Sarawak nengah sebengkah penerang madahka, program nya nyadi siti pelasar ke manah dikena negapka pengawa bekunsika penemu sereta pengelandik seni kraf nengah mayuh macham medium sereta chara ngaul pemekuh industri lokal.
“Program ke diatur serak tu senutuk enggau inisiatif nyaga, ngintu sereta ngetanka pemanah seni kraf menua sereta nuju pemeruan industri kraf menua.
“Tekstil di Sarawak ukai semina kain aja, tang nyadi kelai filosofi pengidup, pengandal, sereta kreativiti komuniti,” ku iya.
Iya nerangka kraf tekstil Sarawak bekaul enggau kain tradisional ti digaga komuniti pribumi nengeri Sarawak empu, ti ngembuan penteba khas ke bisi bida ari tekstil bukai di Malaysia enggau ba renggat dunya.
“Tetiap tekstil bisi bida enggau pemanah kediri empu, elbih agi ti dipeda ari sukut teknik, simbolisme ti silik, sereta kaul enggau rampa menua enggau budaya pribumi.
Kelimpah ari nya, pemanah sesebengkah tekstil nya mega nyadika iya lanting seni ti mesti seruran dijaga manah sekalika dalam konteks tradisional tauka moden.
Penyelai enggau chara ngaga kraf tekstil Iban patut dipelajar
Siku panel ke bisi dikangau meri licha ba dalam program nya, Kurator Muzium & Galeri Yayasan Tun Jugah, Janet Rata Noel madahka, tekstil Iban mayuh digaga bepelasarka utai tumbuh, jelu sereta ensera tauka mitos.
Nya alai, penyelai enggau teknik ti dikena ngaga tekstil Iban nya patut diterang enggau diajar ngagai orang bukai, tebal agi sida ke bisi pengerindu ba dalam pengawa ngaga tekstil, kelimpah bala pemekuh industri.
“Ambika chunto, mayuh macham teknik enggau motif ti dikena lebuh nenun pua kumbu, pua sungkit, kain karap, baju burung, baju sungkit sereta baju pilih,” ku tandu iya.
Iya nerangka, entara motif ti suah dikena maya ngaga tekstil Iban baka tubu, kemiding, paku kelindang enggau jelu baka mayau, burung, rusa sereta ke bukai.
‘Pia mega bisi tekstil ti mantaika motif burung besugu, buah burung enggau buah rusa (ti suah dikena ngaga kain kebat) sereta mayuh agi,” ku terang iya.
Kelimpah ari nya, pua kumbu ngembuan mayuh macham motif, chura sereta bungai sereta enda tau ditenun ngapa laban tetiap pua kumbu ngembuan reti kediri empu, tebal agi dalam pengidup komuniti Iban.
Mesti nemu bida entara pua kumbu enggau kain kebat
Sebedau tu, dalam sebengkah penerang, Pemegai Amanah Pengatur Yayasan Tun Jugah, Melia Linggi mega bisi ngelalau reti leka jaku ‘Pua Kumbu’ enggau ‘Kain Kebat’ patut dikena sechara betul ngambika mensia mayuh enda saru pasal reti ke nemban ngaul leman tekstil nya di Sarawak.
Rambau program BorneoCraft Global 2024, Yayasan Tun Jugah mega bisi nerangka reti leka jaku ti betul bekaul enggau tekstil asal komuniti Iban nya.
Iya nerangka bisi sekeda orang agi saru ngumbai semua produk, barang anta ti dikena indu enggau lelaki ke ngena chura tauka motif tekstil tradisional Iban nya disebut pua kumbu, tang kebendar iya ukai.
“Barang enggau aksesori ti dikena orang indu enggau lelaki ti nunda Pua Kumbu dikumbai Kebat, ukai Pua Kumbu,”ku iya. – TVS
