KUCHING, 13 Jun: Pengawa Petroliam Nasional Berhad (PETRONAS) ti nuntut bayar ari siti jamin bank ngagai Petroliam Sarawak (PETROS) enda sah sereta betingkah enggau Ordinan Ngagih Gis 2016 (DGO 2016) ti berengkah dipejalaika di Sarawak kena 1 Ogos 2018.
Dalam sesyen mendingka saman sivil bekaul enggau tuntut nya hari tiga tu tadi, luyar ti ngarika Petros, Tan Sri Cecil Abraham madahka pengudah DGO 2016 dipejalaika sereta diubah dalam taun 2013 semina aggregator gis ti bisi lisin aja dikemendarka ngurus sereta ngagih gis di wilayah tu.
Ku iya madah, berengkah 1 Februari 2024, Perintah Sarawak sechara rasmi udah nyiri PETROS nyadi aggregator gis tunggal di nengeri tu.
Ku iya nerang, pengawa PETRONAS ti terus mekalka gis sechara nadai lisin ti sah ukai semina ngelanggar undang-undang nengeri, tang mega enda ngasika gerah Perintah Nengeri ti deka ngagih bekal gis nengah PETROS.
Tan Sri Cecil nerangka pengawa PETRONAS ti nuntut jamin bank enggau nadai notis kena 14 Oktober 2024 nya enda manah sereta enda nitihka undang-undang laban kunterik Sempekat Nyual Gis Sarawak (SGSA) ti dipeda dalam tuntut nya enda sah agi ketegal enda nitihka DGO 2016.
Nangkan ke nya, luyar ti ngarika Perintah Sarawak, Dato Sri Fong Joo Chung nengah penerang iya madahka DGO 2016 sah ari sukut Konstitusyen bepelasarka Borneo States Order 1963 ti meri kuasa ngagai Nengeri Sarawak numbuḥka undang-undang bekaul enggau pengawa ngagih gis.
Iya nyemetak madahka SGSA iya nya sempekat komersial lalu enda ulih nyadika kebuah ngelaungka undang-undang negeri ti benung dikena diatu.
Ku iya madah agi, nadai bisi siti klausa dalam SGSA ti ulih ngaitka nya enggau Akta Pembangunan Petroleum 1974 (PDA 1974) sereta PETRONAS enda ulih ngena akta nya ngelaban DGO 2016.
Prosiding ke diatur ba mua Komisioner Akim, Datuk Faridz Gohim Abdullah udah ditangguh enggau deka disambung baru kena 25 enggau 26 Ogos tu dikena mendingka penerang balas ari pengari Perintah Besai, PETRONAS enggau saut ari PETROS.-TVS
