KUCHING, 11 Jun: Opis Betanam Betupi dipinta lebih ransing agi nyaga enggau nambahka tikas produktiviti ngeluarka varieti padi lokal ba wilayah tu.
Menteri Industri Pemakai, Komoditi enggau Pemansang Wilayah Sarawak (MFICORD), Dato Sri Dr Stephen Rundi Utom madahka, taja pan diatu pengawa mansutka padi hibrid chakah dipejalaika, tang pengawa bumai padi varieti tulin lokal mesti seruran dikemeratka.
“Bepelasarka pekara ti dipeda aku, mayuh raban gagit ati deka ngemansangka pengawa bumai padi varieti hibrid, lebih agi ari menua China enggau ke bukai.
“Bisi mega mai varieti benih padi enggau nguji ngulihka tebangkar ari China.
“Taja pan pia, Opis Betanam Betupi mesti nyaga varieti padi tulin menua kitai. Biosekuriti kitai mesti terit enggau tegap. Kami enda madahka kitai enda diperansang mansutka padi nengah chara hibrid, tang enti kita nemu padi tulin kitai , padi lokal lebih premium,” ku iya madah.
Iya mansutka jaku nya rambau Program Apresiasyen Opis Menteri Industri Pemakai, Komoditi enggau Pemansang Wilayah Sarawak (MFICORD) 2025 di Kuching, Hari Dua tu tadi.
Beduduk enggau nya, Rundi nerangka raban ke bekaul mega mesti ngiga chara dikena nambahka tikas produktiviti ngeluarka padi tulin lokal.
Iya mega madahka M-FICORD deka meri tumpu ngagai pengawa ngeluarka pemakai jelu ngambika menua tu enda kelalu bepanggai ngagai asil eksport.
“Premier Sarawak (Datuk Patinggi Tan Sri Abang Johari Tun Openg) udah bejadika kilang penganchur utai tumbuh di SALCRA ke nyadi sebagi ari pemakai jelu tupi tauka ruminan,” tandu iya.
