KUCHING, 11 Jun: Ajat Indu Batang Rajang iya nya ajat asal ti pemadu diangkunka komuniti Iban di pelilih menua Kapit, Kanowit, Song enggau Baleh di Sarawak diatu nyau majak dikerinduka raban nembiak rebak baru.
Bisi sekeda orang lebih agi nembiak rebak baru engka jarang ninga tauka meda main asal bansa tu.
Taja pia, ku siku perindu main asal bansa Iban ke mega Lulong Gawai Kapit 2025 Joyce Elysa madah, Ajat Batang Rajang sebagi ari main asal ti chukup nyelai sereta bisi bida ari ajat bukai.
Joyce, 22 taun berengkah rinduka main asal Iban bepun ari siti video ti dipeda iya ba media rama pengajar iya ti mantaika Ajat Batang Rajang sereta ngepan ti chukup badas.
“Bepun ari siti video ti dipeda aku ba media rama pengajar aku iya nya Albert Sigan Anak Saliman mantaika Ajat Batang Rajang serta ngepan ti badas, aku berengkah deka belajar ajat nya.
“Pia mega aku endang rinduka pengawa lama asal bansa Iban lebih agi baka ajat orang rumah panjai laban bungai iya lebih nyelai,” ku iya.
Iya ke mega Lulong Gawai Kapit 2025 taun tu ukai semina ngembuan pemintar enggau pemajik aja, tang mega landik mantaika main asal bansa Iban, lebih agi ngajat.
Indu asal Batang Rajang tu madahka ajat baka tu mesti ditanka ngambika enda punas sereta meruan bisi dipeda rebak dudi.
Nangkan ke nya, iya mega meransang mensia mayuh tebal agi nembiak rebak baru ngambika nyaga sereta ngenanka budaya enggau main asal bansa Iban ke bukai.
Kebuah pia, ngambika nembiak rebak baru nemu penatai diri empu , laban tetiap main asal ti dibantaika ngembuan reti ti beguna amat ba dalam pengidup ninting hari.
“Kelimpah ari nya, tu mega ngambika rebak baru ulih meretika sereta belajar main asal Iban awakka meruan ditampung enggau dipeda nyentuk jemah,” tandu iya.
Rambau Pekit Kumang Gawai Kapit 2025 empai lama tu tadi, Joyce bisi mantaika ajat batang rajang ti jarang dipeda mensia mayuh.
Nya alai, iya meransang rebak baru anang lembau ngayanka main asal menua diri empu awakka semampai tebilang enggau meruan idup nyentuk ke jemah.
Kenu ku Jerita Tuai, ajat tu bepun ari menua Gelung Batu Nakung, siti lanting ti dipeturunka Petara Iban, Ulup Batu Lichin Bujang Ilang Lengain.
Pekayan ajat tu iya nya, Ngepan Kereban Raja tauka ngepan Batang Rajang, dikelala enggau manik alus sereta silik ti midaka iya ari ajat iban menua bukai.
Tetiap bengkah elemen dalam ajat tu nyengkaum bungai ajat, muzik sereta pekayan ti dikena tu nunjukka kaul ti chukup manah dalam raban bansa Iban enggau rampa menua, genturung pendiau enggau tradisyen daya idup iban. – TVS
