SARATOK, 9 June: Ikan keli berat 7.960 kilogram (Kg) udah mai tuah ngagai tim Gorgon Kupang pengudah ke dipadu ngempu gelar champion Pekit Nginti ‘Game Santai Gawai Kolam’ SGB, Sungai Brangan ke diatur kemari.
Bekau ari pemujur nya tim Gorgon Kupang mai pulai perais mata duit RM5,000.
Udah nya, lumur dua dipenggi tim TM Sri Aman ke bela tegintika ikan keli berat 6.625 Kg lalu ngujungka sida mai pulai perais mata duit RM1,000.
Lumur tiga enggau empat diempu tim Nanga Ibus enggau Khiong bulih ikan pemerat 6.515 Kg enggau 6.460 Kg lalu nerima perais RM500 enggau RM300.
Nangkan ke nya empat pemenang bukai ke bulih penuduk lumur lima nyentuk sepuluh enda pulai enggau jari puang pengudah sida bela diberi perais mata duit RM200 siku.
Udah nya, sida ke bulih penuduk lumur 11 nyentuk 30 mega enda dilebu laban diberi perais pengaga ati penyampau RM120 lalu penginti ba penuduk 31 nyentuk 50 bela nerima perais RM100 siku.
Tuju pekit nya diatur dikena nyungkak sosio ekonomi peranak di Saratok nengah aktiviti ke manah ke pengerai seraya ngedutka kaul sida enggau pangan diri.
Tauke pegung SGB Sungai Brangan, Kaunselor (KR) Stephen Arin Lutek, berasai gaga meda timbal ke chukup manah ari 400 penyereta pekit.
“Aku ngasai juluk ngatur pekit tu nyadi pelasar dikena nyungkak sosioekonomi peranak di Saratok udah tejapai.
“Tu nyata dipeda nengah pemayuh temuai ke datai enggau mayuh mega pedagang mit muka bansal bejual sekumbang pekit tu diatur,” ku iya maya dirandau pengari TVS, Hari Minggu.
Ku terang iya, semangat beserakup ba raban pemekit chukup ngemegah ati nyau baka diri sebilik.
“Kitai chukup berasai temegah laban sida rindu bebakih enggau pangan diri sekumbang pekit diatur berengkah pukul 9 pagi nyentuk pukul 2 ngalihari.
“Pengaga ati berupai dipeda ba mua sida, taja kedua nya puntan teulihka sebarang penuduk,” ku iya.-TVS
