GERIK, 9 June: Asil pansik tumu raban polis tetemuka, penusah aksiden ke ngujungka 15 iku nembiak ke benung nampung pelajar ba Universiti Pendidikan Sultan Idris (UPSI) di Tanjung Malim bebadi nyawa nya nyadi beduduk ari bas ke ditepan sida telantakka belakang kerita Alza, sebedau ke tebelungging.
Kepala Polis Perak Datuk Noor Hisam Nordin madah, bas nya ngundan 42 iku nembiak nyengkaum lapan iku nembiak lelaki enggau 32 iku indu, beumur antara 21 nyentuk 23 taun, semua sida ari Pantai Timur.
Iya madah bas nya direjister ba Kedah, disewa khas semua nembiak ke bekaul bekejang ari Jertih, Terengganu kena pukul 9 malam tadi laban deka pulai baru ke kampus di Tanjung Malim, Perak sebedau ke aksiden ba KM53, Jalai Raya Timur-Barat (JRTB), semak Tasik Banding, Gerik.
“Penusah aksiden nya udah ngujungka 15 nembiak bebadi nyawa lalu semua bangkai sida agi nganti proses buntas pansik.
“Urung 13 bangkai sida nya dianjung ngagai Sepital Raja Permasuri Bainun, lalu dua agi bangkai dianjung ke Sepital Gerik.
“Urung 27 agi nembiak iya nya 23 iku nembiak indu enggau empat nembiak lelaki diripotka bakal. Deriba bas nya ke beumur 40 taun enggau pemantu iya beumur 44 taun mega bakal bekau ari penusah nya,” ku iya nengah sebengkah aum media ke diatur ba Indu Opis Polis Kontijen Perak ditu, sehari tu tadi.-TVS
