SARATOK, 24 Mei : Pengerami Gawai Dayak di Saratok taun tu deka lebih richah ari selama beduduk ari bemacham pekit deka diatur.
Pengempu Pegung Nginti SGB Sungai Brangan, Kaunselor Stephen Arin Lutek madah, pemutus ngatur baru pekit nginti nya digaga beduduk ari bisi peminta ari menia mayuh.
“Kitai sama nemu, empai lama baru udah diatur pekit nginti iya nya ba pun bulan Mei tu tadi lalu timbal iya chukup manah.
“Nya alai, bekau ari peminta mensia mayuh, diatu kami deka ngatur baru ‘Pekit Game Santai Gawai Kolam SGB’ kena 8 June,” ku iya madah ngagai pengari TVS, empai lama.
Tandu iya, pekit serak tu bisi bida iya nya ditatak ngagai 428 iku pengintu aja.
“Penyampau pemekit ditatak kami naka 428 iku aja nginti ba Pegung A lalu timpuh pekit berengkah pukul 10 pagi nyentuk pukul 2 ngalih hari,” ku iya.
Nerang silik, iya madahka kategori khas ikan berat 4 kilogram (KG) enggau 5 KG deka diatur lalu pemenang deka mai perai RM500 ba genap kategori.
“Sebaka enggau pekit sebedau tu, kami mega bisi ngatur kategori khas ikan pemadu berat tauka dilkumbai Jackpot ungkup ikan pemerat 4 enggau 5 KG.
“Kededua pemenang kategori pekit tu ila deka diberi perais RM500,” ku iya.
Nangkan ke nya, iya madahka perais penuh disedia ungkup pekit tu ila manggai RM14,000 lalu pemekit ke bisi ati betanya tauka rejister masuk pekit tu ulih betelefon terus nuju Encik Grand nengah lumur 010-8981677, Encik Raymond (013-6834063) enggau Encik Gary (012-8453808).-TVS.
