KUCHING, 23 Mei: Agensi Pemansang Wilayah Tengah Rajang (MiRRDA) diatu chakah ngemujurka mayuh macham projek pemansang dikena munaska penyeranta seraya mantu nyungkak penatai pemisi ruang bilik ke mendam ba menua ulu.
Chairman MiRRDA, Datuk Aaron Ago Dagang madahka, entara pekara ke diberi tumpu agensi nya nyerangkung mutarka taka penyeranta ke tinggi ti diambi ari asil pansik sebedau tu, tebal agi ba kandang menua pesisir.
“Kandang endur Selangau enggau Kanowit ngerikodka taka penyeranta ke tinggi.
“Nya mih kebuah, semua projek ti dipejalaika ba baruh MiRRDA dilangkar dikena mutarka isu nya sereta tau mantu nambahka tikas ekonomi ruang bilik perayat lokal,” ku iya.
Iya mansutka jaku nya seninjik nemuai meri basa ngagai Premier Sarawak, Datuk Patinggi Tan Sri Abang Johari Tun Openg, ba Kompleks Kunsil Nengeri (DUN) Sarawak, sehari tu tadi.
Pemesai bukai ke bisi datai, Menteri ba Opis Premier Sarawak, Dato Sri John Sikie Tayai, Sapit Menteri ba Opis Premier Sarawak (Penyeraris Projek ungkup Agensi Pemansang Wilayah, Dewan Bandaraya Kuching Utara enggau Pekara Islam), Datuk Dr. Abdul Rahman Junaidi, Kaban Kunsil Nengeri (ADUN) Tamin, Ir Christopher Gira Sambang, ADUN Ngemah, Anyi Jana, ADUN Machan, Allan Siden Gramong sereta Datuk Amar Jaul Samion.
Aaron ke mega Menteri Penyerakup Menua nerangka pasal nya entara tuju tauka objektif penumbuh agensi pemansang nya.
Ku iya madah, ari penyampau semua agih RM1.5 bilion ke udah dikemendarka, penyampau RM1.1 bilion udah diungkupka dikena bejalaika pemansang infrastruktur, lebih agi ngaga jalai baru ti nyambung endur ke nyadi tanah hak adat Bumiputera (NCR) enggau palan pengentap pendiau baru (SPS).
“Semua jalai tu beguna amat dikena muka akses ke tanah NCR ti sebedau tu enda diberi perati, lebih agi pengudah perayat dipindahka ngagai SPS.
“Pemisi jalai tu ngemudahka kami (perintah) ngemansangka sesebengkah kandang endur nya sereta nyaup rayat nambahka penatai pemisi diri,” terang iya.
Kelimpah ari nya, Aaron Ago ke mega Kaban Parlimen Kanowit madahka pasal bisi siti inisiatif meruan ke dibantaika ngaul pengawa bekebun nanam kelapa sawit sechara mit ungkup ruang bilik tauka siku-siku orang.
Projek nya dipelaba bisi daya nyungkak penatai pemisi ruang bilik ba menua pesisir sechara meruan. – TVS
