KUCHING, 23 Mei: Komisyen Komunikasyen enggau Multimedia Malaysia (MCMC) sereta Sarawak Multimedia Authority (SMA) diatu benung bejalaika siti pansik dikena ngelala bagi kandang endur ke agi nadai kena bungkur arus penyambung sereta endur ti mesti dikemanahka tikas ari sukut servis telekomunikasyen.
Sapit Menteri Utiliti enggau Telekomunikasyen (Telekomunikasyen), Datuk Liwan Lagang madahka, pansik nya deka meda enggau beratika teknologi ti engkeman enggau gaya geografi ba wilayah tu nyengkaum pengawa nirika tiang pemanchar sereta ngena bungkur ti bepelasarka satelit.
“Ke penerang semua, status pemansang pansik nya diatu ba renggat kepenudi ditisih.
“Pansik tu mega deka dipejalaika ba baruh inisiatif JENDELA Fasa 2 ti dipelaba berengkah dalam suku keempat taun tu,”ku iya.
Iya mansutka jaku nya rambau nyaut tanya Kaban Kunsil Nengeri (ADUN) Murum, Kennedy Chukpai Ugon maya Aum DUN Sarawak ke-19, sehari tu tadi.
Liwan Lagang ke mega ADUN Belaga nerangka, naka diatu, japai internet ba DUN Murum semina 96.1 peratus.
Iya madahka, bisi 1,591 subskripsyen program Rangkaian Jalur Lebar Luar Bandar Sarawak (MySRBN) dirikodka ba sitak DUN Murum diatu.
“Pekara tu ngayanka sambut ke manah ari perayat lokal ke mendam ba menua pesisir enggau inisiatif digital nya,” tandu iya. -TVS
