SUBIS, 19 Mei: Prorgam Niti Daun Gawai Dayak ukai semina mandangka adat budaya tang kelai identiti (Dayak), pesaka asal enggau penyerakup pupu bansa di Sarawak .
Menteri Industri Pemakai, Komoditi enggau Pemansang Wilayah Sarawak, Dato Sri Stephen Rundi Utom madahka, program ti keterubah iya diatur di Pelilih Subis tu udah mujur ngangkatka siti agi elemen besai dalam budaya bansa dayak iya nya Niti Daun.
“Program tu nyadi kelai penyerakup bala perintah enggau rayat menua tu enggau tuju negapka ulah beserakup, pemeruan pesaka dayak enggau nempa Pelilih Subis nyadi palan dagang temuai.
“Program keterubah tu ukai semina nempa sejarah tang mega meri awak ngagai rebak biak sereta rayat menua bukai ngelala pengaya identiti rayat bansa Dayak sereta etnik di Sarawak,” ku iya.
Iya ke mega Kaban Kunsil Nengeri (ADUN) Kemena madah munyi nya rambau bejaku ba Program Niti Daun Gawai Dayak Pelilih Subis 2025 di Miri kemari.
Ku iya nambah, pengawa bejalai beraban penyauh dua kilometer nya disempulang enggau tebah gendang pampat, ngajat enggau taboh ti mandangka pengaya sereta pemanah budaya di Sarawak.
Achara baka tu mega ngembuan potensial ulih dijadika siti produk dagang temuai budaya ninting taun di Pelilih Subis.
Penyampau 13 kontinjen ngambi bagi dalam achara tu ti dipasuk 2, 000 iku penyereta.-TVS
