KUCHING, 15 Mei: Pemansang komuniti Dayak kemaya hari diatu bepanggai ngagai pemujur ba dalam bidang pelajar sereta pengeransing bala pengajar dalam ngesan tangkup pengawa meri penemu enggau ngembing nembiak.
Nengah sebengkah penerang ba laman Facebook Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom nyemetak madahka, bansa Dayak ulih maju enti anak bulih pelajar ti bekualiti sereta pengajar komited bejalaika pengawa sida.
“Aku sigi setuju enggau buah penemu ti disebut Kaban Kunsil Nengeri (ADUN) Tamin, Ir Christopher Gira Sambang.
“Kitai (komuniti Dayak) bisi daya nempa kurang lebih siku jutawan ari tetiap rumah panjai enti pemujur dalam pelajar dikemeratka,” ku iya.
Iya mansutka jaku nya rambau Program Makai Lemai beserimbai enggau Pengerami Hari Pengajar 2025 ke diatur Gerempung Kepala Pengajar Malaysia (PGBM) Pelilih Selangau, kemari.
Berebak enggau nya, Sapit Menteri Dagang Antarabansa, Industri enggau Meranak Puku (MINTRED) Datuk Dr Malcolm Mussen Lamoh madahka, mantaika pengaga ati ngagai semua pengajar ti udah bebendar ngajar enggau ngembing nembiak ari menua ulu nyentuk sida pandai sereta bisi peluang nampung pelajar ke tikas universiti.
“Bisi sekeda nembiak ke mujur ba pelajar tinggi gawa ba dalam sektor perintah enggau peribit,”terang iya.
Nangkan ke nya, ADUN Tamin, Ir Christopher Gira Sambang madahka pengajar nyadi jematan ti beguna amat ngempung nembiak sekula, apai indai enggau perintah.
“Kerejasama entara pengajar enggau pengari rayat mesti diteruska ungkup pemaik pengidup jemah anak kitai sereta sama besaup ngemansangka pekara pelajar ba kandang menua pesisir,”ku iya.
Ketiga-tiga sida meri turu penyampau semua manggai RM35,000 ngagai PGBM Pelilih Selangau ke nyadi tanda sukung ngagai pengawa negapka raban pengajar sereta nambahka pengelati pelajar mungkur semua renggat. – TVS
