KUCHING, 15 Mei: Mensia mayuh dilalau nyadi ‘saintis komuniti’ ngeripotka aktiviti tauka pengawa ngelepaska bansa ikan kampar invasif ba kandang endur sungai ba menua tu.
Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben nyemetak madahka, kerejasama ngaul semua raban endang beguna amat ngambika ulih nagang bansa ikan kampar invasif ti tau ngeruga ekosistem sungai.
“Enti ulih kitai anang ngena ikan bansa tu nyadi umpan, anang ngelepau ke dalam sungai, tau dibunuh enti nyema bisi tetangkapka ikan tu,” ku iya.
Iya mansutka jaku nya rambau bejadika Program Ngiga enggau Nangkap Ikan Kampar Invasif ti keterubah diatur ba Waterfront Kuching berengkah ari 13 nyentuk ke 15 Mei 2025 Hari Tiga tu tadi.
Beduduk enggau nya, Opis Pengawa Berikan Tasik Sarawak nengah sebengkah penerang ba laman Facebook madahka, bisi 40 spesies ikan kampar invasif nyerangkung Tilapia, Keli Afrika, Baung Iku Merah, Flower Horn enggau Arapaima ulih ngeruga bansa asal ikan bukai di Sarawak.
Program nya diatur nengah kerejasama strategik entara perintah Sarawak enggau perintah besai ke ngaul agensi baka Opis Betanam Betupi Sarawak, Unit Pengelikun enggau Neritka Undang-Undang Sarawak (UKPS), Lembaga Sungai-Sungai Sarawak (LSS), Kaunsil Pengeraja Asal enggau Rampa Menua (NREB), Sarawak Forestry Corporation (SFC), Dewan Bandaraya Kuching Utara (DBKU), Opis Pengawa Berikan Tasik Sarawak (JPLS) sereta Kaunsil Pemansang Ikan Malaysia (LKIM).
Sama bisi datai, Sapit Menteri Industri Pemakai, Komoditi enggau Pemansang Wilayah Sarawak (Industri Pemakai) Datuk Dr Abdul Rahman Ismail. – TVS
