JULAU, 14 Mei: Dua Projek Jalai Estet Pekebun Mit (JLPK) udah dikemendarka ba Julau taun tu ngaul Rumah Panjai Sang di Rantau Chire enggau Rumah Panjai Guntol di Bekiok, Merurun ngena agih penyampau RM600,000.
Sapit Menteri Pengawa Bekebun enggau Komoditi, Datuk Chan Foong Hin madahka, nya sebagi ari chara dikena ngemanahka sistem logistik enggau ngemudahka akses ngagai kebun lada.
“Aku empu udah nyerahka Projek Jalai Estet Pekebun Mit (JLPK) Lada Rumah Sang, Nanga Sekedang, Entabai, Julau sepanjai 1.5 kilometer ke udah tembu digaga kena Disember 2024 sechara simbolik ti ngena kos penyampau RM209,540,” ku iya madah.
Iya mansutka jaku nya nengah sebengkah penerang pengudah nurun ngabas betemu enggau raban pekebun mit lada beserimbai enggau Program Nemuai Seraya Gawa Industri Agrikomoditi Lada ba Rumah Thomas, Nanga Sekedang, Entabai, Hari Dua tu tadi.
Rambau program nya, iya bisi nerangka pasal nilai eksport lada menua bagi taun 2024 ngerikodka penyampau RM186.67 juta ti dibanding enggau RM149.97 juta taun sebedau nya.
“Peminta lada Malaysia terus tinggi ketegal kualiti, lebih agi kurang ngena rachun indu utai sereta bisi bau tauka aramo kediri empu ti nerima peminta tinggi ba markit besai baka menua Jipun, Korea, China sereta Eropah,” tandu iya.
Chairman Kaunsil Lada Malaysia Dato Anyi Ngau enggau Kaban Kunsil Nengeri (ADUN) Meluan Rolland Duat Jubin, Sekretari Tetap Opis Menteri Industri Pemakai, Komoditi enggau Pemansang Wilayah Sarawak, Datu Sirai Daha sama bisi nyempulang iya niki ngagai sekeda rumah panjai pekebun mit lada di Julau. – TVS
