ABU DHABI, 8 Mei: Sarawak deka bechuanka pemansang Penyangkai Kapal Khalifa di Abu Dhabi dalam ngaga penyangkai kapal ke lebih moden sereta bisi daya semekih jemah.
Premier Sarawak, Datuk Patinggi Tan Sri Abang Johari Tun Openg madahka, penyangkai kapal nya chunto pemadu manah lalu tuju penemuai deligit perintah Sarawak ke palan nya kemari (Hari Tiga) dikena ngiga peluang nempa kerejasama strategik, tebal agi dalam pemansang penyangkai kapal sereta logistik.
“Aku empu meda pemansang ba palan nya chukup maju.
“Bepun ari penyangkai kapal mit sereta nyadi sebuah penyangkai kapal betikas antarabansa ti ngena teknologi pemadu baru sereta perengka moden,” ku iya.
Iya mansutka jaku nya seninjik nemuai ke Penyangkai Kapal Khalifa Abu Dhabi, kemari.
Abang Johari nerangka, sepemanjai nemuai kia, sida bisi diberi penerang enggau pengeludas pasal sejarah enggau pengerembai penyangkai kapal nya dalam timpuh 12 nyentuk 13 taun.
Ku iya madah, Penyangkai Kapal Khalifa entara penyangkai kapal besai di Abu Dhabi ke digaga ba tetengah tasik, seraya nyadi siti langkah rapat ti bisi potensyel dibai sereta dipejalaika ba Kuching dudi hari.
“Penyangkai Kapal Abu Dhabi diatu ngesan tangkup pengawa ti beguna amat nyadi hab tengah nyambung menua Eropah, Afrika enggau Asia Pasifik,” tandu iya.
Sebedau nya, Abang Johari bisi ngemataka pengawa nyain Sempekat Kerejasama Strategik (MoU) entara Bintulu Port Holdings Berhad (BPHB) enggau Abu Dhabi Ports Group. -TVS
