BUKIT BEGUNAN, 8 Mei: Pekit Reka Cipta Dan Inovasi Pencetus Kreativiti Komuniti Kreatif (RECIP3K) bisi daya mantaika penau enggau pengelandik turai tukuh bala apai indai enggau pengajar bepelasarka subjek anak sida empu.
Nengah sebengkah penerang ba laman Facebook, Kaban Kunsil Nengeri (ADUN) Bukit Begunan, Datuk Mong Dagang madahka, achara nya siti pelasar pemadu badas dikena meda kreativiti enggau inovasyen ke digaga nengah kerejasama rat entara pengajar, apai indai sereta nembiak.
“Kitai ulih meda tetiap karya ke dipandangka sehari tu (Hari Tiga) mantaika komitmen sida ngembing rebak baru ungkup pemaik pengidup jemah,”ku iya.
Iya mansutka jaku nya rambau bejadika Pekit Reka Cipta Dan Inovasi Pencetus Kreativiti Komuniti Kreatif (RECIP3K) ti diatur ba Sekula Primari (SK) Tanjung Bijat, Lingga, kemari.
Berebak enggau nya, iya nerangka pekit nya ke diatur ninting taun ukai semina matak pengerindu sekula ari Bagi Menua Sri Aman, tang mega ari Bagi Menua Betong, Serian enggau Simunjan.
“Penatai bala penyereta ari pelilih menua bukai nyadika achara tu lebih richah sereta ngayanka semangat kerejasama sereta segulai sejalai sida mantu nyukung pemujur pelajar anak,”terang iya.
Mong mega madahka, achara baka nya manah amat nyadi endur bekunsika buah runding sereta penemu pasal produk ke digaga sereta chara ngena ke betul.
Dalam program nya, iya bisi meri geran Projek Mit Menua Pesisir (MRP) penyampau RM 20,000 ngagai Gerempung Apai Indai enggau Pengajar (PIBG) SK Tanjung Bijat enggau meri perais ngagai penyereta ke nyadi pemenang ba dalam pekit nya.
Sama bisi datai, Pengari Pegawai Opis Pelajar Pelilih Sri Aman Wahidin Jangsi, Kepala Pengajar SK Tanjung Bijat Hairani Jeman , YDP Aji Lega, staf SK Tanjung Bijat, Penghulu Anthony Jiram Sampek, Tuai Komuniti enggau Tuai Raban Bansa (KMKK), apai indai sereta bala nembiak. -TVS
