KUALA LUMPUR, 8 Mei: Menteri Kereja Raya, Datuk Seri Alexander Nanta Linggi ningkah jaku dawa ti ngumbai iya bisi kaul enggau isu makai suap ngaul projek Jalai Besai Pan Borneo Sabah (WP35) ke dikerembaika nengah aplikasyen telegram.
Iya nyemetak madahka dawa nya semina petenah, enda belebas sereta bisi niat enda manah.
“Beduduk enggau nya, aku nengah Sekretari Peribit Kanan (Nanta) udah ngaga ripot polis ba Balai Polis Tun H.S. Lee kemari (Hari Tiga) sereta minta raban bekuasa nasat pekara tu enggau jampat,” ku iya.
Nanta nerangka iya ke nyadi siku kaban politik enggau raban kabinet perintah seruran bejalaika pengawa sechara lurus, penuh amanah sereta komited menatika pengelantang rayat enggau pemaik menua tu.
“Dawa ti enda betul tu ulih ngelabuhka nama enggau integriti aku, ngamahka tikas pemujur Opis Menteri Kereja Raya (KKR) sereta perintah Malaysia,”terang iya.
Iya madahka, pesan nya ukai semina dikerembaika nengah Telegram, tang mega ba mayuh macham pelasar media rama, sereta tau ngasuh mensia mayuh irau ati tauka betalatka isu nya.
Nanta ke mega Kaban Parlimen Kapit madahka diri deka meri komitmen penuh enggau kerejasama dikena ngemujurka tasat ngaul pekara nya sereta ngelempaika pengandal ati iya ngagai raban bekuasa bejalaika atur ke patut.
“Sekali agi aku deka jaku petenah baka tu enda ulih nyadi perengka dikena ngelabuhka siku-siku orang, tebal agi ketegal deka beambi ulih dalam politik tauka agenda diri empu ke enda manah,”tandu iya. -TVS
