SEBUYAU, 8 Mei: Bisi 199 iku jelu tupi nerima tuchuk vaksin keterubah, seraya 98 iku nerima dos penyungkak ke diatur beserimbai enggau Program Meri Tuchuk Vaksin Antirabies ba sekeda genturung pendiau di pelilih Sebuyau berengkah ari 5 nyentuk ke 7 Mei 2025.
Nampung sebengkah penerang ari Opis Servis Veterinar Sarawak (DVS), program nya naga deka meri tuchuk vaksin ngagai 297 iku jelu tupi ke nyadi siti langkah rapat dikena nagang pengekai penyakit rabies.
“Inisiatif tu ngaul 30 genturung pendiau disukung penuh Opis Servis Veterinar Sarawak (DVS) ke ngaul indu opis Serian sereta Samarahan, enggau raban Immune Belt Enforcement Team (IBET),” ku iya.
DSV nerangka, penyampau 159 iku pengempu jelu tupi ari 24 genturung pendiau bisi ngambi bagi dalam program meri tuchuk vaksin nya.
Kelimpah ari meri vaksin, program nya mega mekuhka pengawa nambahka pemereti ati mensia mayuh pasal badi rabies enggau pemesai guna meri tuchuk vaksin ti tau nyaga pengerai jelu inang enggau pengelikun ngagai komuniti.
“Raban DVS enggau IBET mega bisi bekunsika penerang senentang kelai dirampit penyakit rabies, chara bejejaga, sereta prosedur berubat ti sema bisi kes diketup jelu ke dipelaba mai igi penyakit rabies,” terang iya.
Berebak enggau nya, DSV ngelalau mensia mayuh seruran nentuka jelu tupi sida nerima vaksin sechara belanggang enggau betelefon ngagai opis veterinar ti sema bisi kelai kes rabies nyadi.
“Sukung ti rat ari semua renggat komuniti deka nentuka program meri tuchuk vaksin (vaksinasyen) ulih ngurangka risiko dirampit penyakit rabies sereta menatika tikas pengelikun genturung pendiau ke lebih selamat ngaul semua orang,” tandu iya.
Penerang ke silik pasal program meri tuchuk vaksin ba endur bukai tau ditanya (betelefon) ngagai DVS Sarawak. -TVS
