BINTULU, 2 Mei: Bintulu Port Holdings Berhad (BPHB) terus komited bejalaika sekeda program Tanggungpengawa Rama Korporat (CSR) sida ungkup pemaik komuniti lokal.
BPHB nengah sebengkah penerang ba laman Facebook Hari Empat madahka, sida temegah ati meda pemujur Program Meri Darah ti diatur empai lama tu tadi ba Wisma Kontena kena 30 April 2025.
“Beduduk enggau nya, kami (BPHB) mega meri pengaga ati ngagai semua bakih strategik kami enggau Bank Darah Sepital Bintulu.
“Semua raban tu tadi udah meri sukung profesionalisme ke tinggi dikena ngemujurka program meri darah tu,” ku iya.
BPHB mega nerangka pasal inisiatif baka nya ngayanka komitmen Penyangkai Kapal Bintulu terus menatika pengelantang rayat di wilayah tu, lebih agi ba endur ngelingi Bintulu.
“Aram mih semua kitai terus nentuka penyeleda semangat tu seraya ngemeranka nilai enggau pemujur ke manah baka tu ba luar penyangkai kapal.
“Kami mega meri terima kasih ngagai 87 iku raban pengereja BPHB ke bisi ngambi bagi dalam program meri darah tu sereta mujur ngumpul 52 pain darah,” terang iya.
Tandu iya, program baka nya endang patut suah diatur laban ngayanka penyiru mensia mayuh mantu nyelamatka nyawa (orang ti begunaka stok darah ba pengawa berubat). – TVS
