LIMBANG, 1 Mei: Sekeda projek pemansang ti digaga ba baruh Projek Transformasyen Menua Pesisir (RTP) sitak Kunsil Nengeri (DUN) Bukit Kota ke digaga nengah Kaunsil Pelilih Limbang (MDL) deka dikemanahka agi, nyengkaum projek waterfront Limbang ke ditaga tembu pun taun 2026.
Sapit Menteri Industri Pemakai, Komoditi enggau Pemansang Wilayah Sarawak, Datuk Dr Abdul Rahman Ismail madahka, pemujur semua projek nya deka nambahka pengelantang perayat ke mendam di pelilih nya jemah.
“Projek tu iya nya ngemanahka padang Desa Pabahanan, pelaman mengeri Limbang, waterfront Limbang enggau Medan Selera Limbang,” ku iya.
Iya mansutka jaku nya nengah sebengkah penerang ba laman Facebook pengudah nurun ngabas taba projek RTP DUN Bukit Kota ensanus.
Dr Abdul Rahman ke mega Kaban Kunsil Nengeri (ADUN) Bukit Kota nerangka pasal pengawa ngemanahka padang Desa Pabahanan deka dipejalaika enda lama agi sereta pelaman mengeri Limbang deka disikap enggau taman endur anak mit bemain.
“Ungkup projek waterfront Limbang deka disikap ngena perengka guna baka endur parking kerita sereta palan endur bedagang (naka diatu bejalai enggau lanchar),” terang iya.
Tandu iya, Pengawa nyeruri enggau ngemanahka Medan Selera Limbang betuju nentuka pengelantang raban pedagang, pedaja sereta temuai ke bisi datai ngagai endur nya.
Sama bisi datai, Kaunselor Sufian Mohat, Chairman MDL, Ir Aizatul Nabilah Suhermanto, Injinir Perintah JKR Limbang, Boniface Lalang, Penulung Injinir MDL, Razis Norudin, Penulung Injinir MDL sereta Roslan Abdul Rahman, Sekretari Eksekutif Palan Servis Komuniti DUN N79 Bukit Kota. – TVS
