SERIAN, 1 Mei: Projek Bekal Ai Wilayah Serian Fasa II ti nelan belanja penyampau RM260 juta disadang tembu penuh manggai bulan April 2027.
Menteri Utiliti enggau Telekomunikasyen Sarawak, Dato Sri Julaihi Narawi madahka, projek ti bepun kenyau Oktober 2024 nya dipelanja penuh ari Perintah Sarawak nengah Opis Menteri Menteri Utiliti enggau Telekomunikasyen Sarawak sereta Opis Bekal Ai Menua Pesisir Sarawak (JBALB).
“Kami ngarap lebuh projek tu tembu ila, iya deka mutarka penanggul bekal ai ti udah lama ditapi perayat ba Bagi Menua Serian,” ku iya lebuh dirandau media seninjik ngulu Penemuai Kereja Rasmi ke Projek Bekal Ai Sarawak Loji Ai Beresi Slabi, kemari.
Ku iya madah, kelimpah ari pengawa bejalaika projek baru nya, kereja ngemanah sereta nganti paip lama mega benung digaga ba kandang endur ke sama ti mungkur agih belanja penyampau RM107 juta dalam timpuh lima taun.
Naka ke diatu, pemansang fizikal Kunterik Renggat 1 udah nyapai 19 peratus, seraya Kunterik Renggat 2 ngerikodka pemansang 7.37 peratus.
“Kami deka nganti semua paip ke lama ti udah tiris enggau jai. Ungkup jalai ari Siburan ke Serian, pengawa nganti nya mungkur paip pemanjai 34 kilometer enggau pemesai 900 milimeter,” ku iya.
Ku iya nambah, Projek Bekal Ai Wilayah Serian Renggat 3 deka dipejalaika pengudah Fasa II tembu.
Projek Bekal Ai Wilayah Serian Renggat 3 mungkur Bagi Menua Kuching, Samarahan enggau Serian.
Penyampau 76 genturung pendiau enggau 1,800 rumah ba Bagi Menua Serian deka nerima pengelantang pengudah projek tu tembu.
Iya nerangka, naka ke diatu, Loji Ai Beresi Slabi chukup dikena mekalka ai di Bagi Menua Serian iya nya penyampau 112.2 juta liter sehari (MLD).
“Loji Ai Beresi Slabi ngembuan kapasiti ngasilka ai penyampau 110 MLD lalu diatu bisi tambah penyampau 75 MLD.
“Kitai mega bisi siti agi Loji Ai Beresi di Balai Ringin ke ngembuan kapasiti 2.2 MLD,” ku iya.-TVS
