Miri, 1 Mei: Program enggau inisiatif ti ulih negapka tangkup pengawa pemekuh industri kraf mesti dikemanahka agi ngena strategi dagang moden enggau sukung perintah.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madahka, pekara nya endang beguna amat dikena nentuka produk kraf lokal rembus ngagai makit ke lebih besai, nyerangkung ba tikas antarabansa.
“Kitai ulih meda krafjari ti digaga komuniti Orang Ulu di Sarawak bisi potensyel besai nyadi produk dagang temuai, seraya meri penatai pemisi ngagai komuniti ke mendam ba menua ulu sereta nyungkak ekonomi nengeri tu.
“Krafjari ukai semina lanting budaya aja, tang aset dagang temuai ke ulih ngenataika penguntung ngagai ekonomi nengeri,” ku iya.
Iya mansutka jaku nya rambau Program Makai Lemai Kraf Kreatif Orang Ulu di Miri, malam tadi.
Beduduk enggau nya, Snowdan nerangka pasal di Asia Tenggara, industri kraf udah manggai asil penyampau RM200 bilion enggau Sarawak bisi daya nambahka penyampau nya enti pemekuh industri lokal diembing ngena chara ke relevan sereta diberi pengeludas ke patut.
Ku iya madah, mayuh macham pengawa benung dipejalaika nyengkaum pemansang direktori khas pedagang kraf nengah Kaunsil Kraf Sarawak ti disikap enggau kod QR dikena ngemudahka pemeli lokal enggau temuai menua luar meli produk ti dikedeka sida.
“Asil jual krafjari Malaysia taun 2024 manggai RM410 juta, tu ngayanka peminta ke tinggi ngaul produk pengelandik jari ti ngembuan nilai seni enggau identiti etnik ke tegap.
