KUALA LUMPUR, 1 Mei: Perintah MADANI terus komited menatika pengelantang tetiap iku raban pengereja, ukai semina bebendar deka ngerikod penumbuh ekonomi aja.
Menteri Besai, Datuk Seri Anwar Ibrahim madahka, perintah endang semampai deka nentuka pengidup rayat pupu bansa ba menua tu meruan enggau dibasa.
“Ketegal semangat nya tadi, perintah ngelangkar sistem pinchin baru raban pengereja perintah ngena chara ke bebida.
“Inisiatif tu ukai semina deka nambahka taka gaji, tang deka nentuka sida nerima peniki gaji nitihka pematut,” ku iya.
Iya mansutka jaku nya nengah sebengkah penerang ba laman Facebook beserimbai enggau Pengerami Hari Pengereja Pengawa 2025 ke diatur ba Axiata Arena Bukit Jalil pagi tadi.
Sama bisi datai dua iku Sapit Menteri Besai, Datuk Seri Dr. Zahid Ahmad Hamidi enggau Datuk Seri Fadillah Yusof sereta raban menteri ke bukai.
Anwar nerangka senentang langkah rapat nya senutuk enggau juluk perintah MADANI ti deka ngaga baru menua tu bepelasarka ‘nilai karamah insaniah’ ke alai basa siku-siku orang nya enda disukat tauka dipeda ba reta tengkira, pangkat, tang ba jasa, budi sereta pemujur ke dijapai.
“Sehari tu, kami (perintah) ukai semina bejaku aja. Kami udah mujur bejalaika urus perintah ke manah, reformasyen fiskal sereta nikika taka gaji pekereja.
“Kelimpah ari nya, perintah mega terus bebendar ngemunaska isu makai suap sereta ngetuka budaya salah ngena kuasa ngayaka diri empu enggau kaban belayan aja,” terang iya.
Beduduk enggau nya, Anwar ngelalau semua raban pengereja pengawa terus begempung ngangkatka tikas pengidup diri sereta anang ngemendarka orang bukai beambi ulih ari pemanah enggau penelap diri.
“Aram mih kita semua bela ransing gawa, saum sepenemu ngemansangka Malaysia nyadi menua pegari ba rantau tu,” tandu iya. – TVS
