SELANGAU, 1 Mei: Tuai Komuniti enggau Tuai Raban Bansa (KMKK) mesti lebih chakah, ulih dikearap bejalaika pengawa sereta ngemeratka integriti lebuh nerangka pasal polisi enggau program perintah ngagai rayat.
Kaban Parlimen Selangau, Edwin Banta madahka, ketiga-tiga penteba nya beguna amat dikena napi enggau mutarka pemar ke tau meri empas ba dalam pemansang komuniti.
“KMKK ukai semina nyadi tuai dalam komuniti sekalika ba sesebengkah rumah panjai tauka genturung pendiau aja.
“Sida tu ke suah nyadi jematan entara rayat enggau perintah, lalu nya mih kebuah KMKK mesti sikar enggau jampat ngereja pengawa,” ku iya.
Iya mansutka jaku nya nengah sebengkah penerang ba laman Facebook pengudah bejadika ‘Program Pemantapan Perkhidmatan & Peranan KMKK Daerah Selangau 2025’ diatur ba Hotel Kingwood, Sibu, kemari.
Edwin nyemetak nerangka pasal tetiap iku KMKK mesti ngembuan timpai ke jauh, bejalaika pengawa enggau penuh amanah sechara lurus sereta enda bechiping.
Ku iya madah, program nya ti diatur Opis Pelilih Selangau digulu lebih 230 iku penyereta betuju dikena nambahka pemereti ati KMKK senentang tangkup pengawa diri empu enggau negapka iring tuai ungkup pemansang ke meruan.
Bela bisi datai Residen Bagi Menua Sibu, Abang Mohamad Porkan Abang Budiman, Penulung Pegawai Pelilih Selangau, Chua Siong Wei, Pegawai Pelilih Sibu, Wee Teck Min enggau bala KMKK Pelilih Selangau.
Sebedau tu, ba dalam sebengkah pengerami ba rumah panjai, Edwin bisi minta semua Komiti Pemansang enggau Pengelikun Genturung Pendiau (KMKK) mesti nemu nama bagi projek ti endang patut dikemerat tauka dipinta ungkup pemaik sida serumah.
Iya madahka, pekara nya endang patut dipereti laban sekeda JKKK rumah panjai bisi minta lebih ari dua projek, lalu nya bepanggai ngagai penyampau turu tauka agih ke diberi sereta deka dikemendarka sechara berenggat. -TVS
