CARDIFF, 1 Mei: Sarawak nempa sejarah baru dalam dunya teknologi pengudah ngelancharka KETEQ AI, iya nya pengubah kuasa pintar bepelasarka Pemintar Artifisyel (AI) keterubah ba dunya ti dikemansangka penuh ari Sarawak.
Premier Sarawak Datuk Patinggi Tan Sri Abang Johari Tun Openg madahka, tu sebagi ari penyulut besai dalam bejalaika Sarawak Semicondutor Roadmap Twenty Thirty and Beyond, ke mai tuju nyadika nengeri tu hab inovasyen teknologi tinggi serantau.
“Kelimpah ari ngelangkar pelasar strategik enggau ngelui penyampau sereta penyulut ke ngemegahka ati, siti ari pemujur ke pemadu transformatif ungkup Sarawak ke endang nyadi ‘game changer’ iya nya pemansang Edge AI Power Converter, ” ku iya.
Iya madahka pekara nya rambau nemuai ngagai CSA Catapult di Cardiff, Wales kena Hari Dua tu tadi.
Kereban nya ulih nyidi, melaba enggau ngemetulka anomali sistem sechara autonomi dalam timpuh kurang ari satu persepuluh milisikin.
Ku iya madah agi, tu siti penyulut ke chukup besai dalam bidang elektronik kuasa enggau sistem pengatur.
“Aku temegah ati deka bekunsika Edge AI Power Converter tu iya nya siti pemujur teknologi enggau keterubah ba dunya. Kereban pengerintis tu digaga dikena nyidi, melaba enggau ngemetulka anomali sistem sechara automatik ba maya ke nemban, semua iya dalam timpuh kurang ari satu persepuluh milisikin.
“Tu pengari besai dalam bidang elektronik kuasa enggau optimum sistem pengatur seraya negapka agi seraka teknologi ke baru,” ku iya.
Pejalai nuju ngagai pemansang KETEQ AI berengkah setaun ke udah, iya nya kena 23 April 2024 lebuh memorandum pemereti ati entara SMD enggau Semicondutor enggau CSA Catapult ditempa ba Parlimen United Kingdom.
Ku iya madah, kerejasama tu ngerandang jalai baru dalam misi Sarawak dikena negapka ekosistem teknologi enggau inovasyen lokal.
Enggau slogan ‘Innovation In Just a Snap’ KETEQ AI ukai semina mandangka pengulih anak lokal dalam bidang teknologi tinggi, tang mega ngengkahka Sarawak ba mata dunya nyadi pengerandang dalam pemintar artifisyel enggau sistem kuasa pintar.-TVS
