SIBURAN, 1 Mei: Bisi 30 iku penyereta Kus enggau Latih Proses Produk Ili Bepelasarka Ikan Sungai di Siburan diberi pengeludas senentang potensyel asil pengawa berikan darat (pengawa pansik bekaul enggau produk ikan sungai).
Opis Betanam Betupi Sarawak nengah sebengkah penerang madahka, program nya ti diatur Opis Betanam Betupi Pelilih Siburan ba baruh Program Pemansang Modal Mensia (PMI) 2025 ba Kampung Chupak, Siburan, Serian berengkah ari 29 nyentuk ke 30 April 2025.
“Program tu meri latih sechara teori enggau ‘hands- on’ ngagai bala penyereta.
“Pengawa bekunsi pasal Seksyen Industri Bekebun ari ACDO, Emily Abigail Richmond Allan sereta diteruska sesyen teori enggau hands-on ari SCDA, Prisca Ameu, Nonie Laken enggau Olivia ak Malek @ Peter Gaman pan bisi diatur,” ku iya.
Iya nerangka pasal bala penyereta rambau sesyen teori enggau hands-on diberi penerang pasal produk asil berikan darat baka ngaga kerupok lekor ikan Tilapia, serunding ikan Tilapia, mini popia puak serunding ikan Tilapia, nugget ikan Tilapia, gulung isi ikan Tilapia sereta sambal ikan Keli.
Pengerami nangguh program nya dipejadika Pegawai Betanam Betupi (AO), Salimah Mohammad Salim, sereta bisi digulu Pegawai Nguasa Opis Betanam Betupi Pelilih Siburan, Penulung Pegawai Betanam Betupi (AAO) Chris Owen sereta Tuai Kampung Chupak, Edward.
“Kami arapka pengudah program tu diatur lebih mayuh pedagang baru ulih ngemujurka diri dalam sektor industri bekebun enggau pengawa berikan darat ba endur ngelingi Siburan,” tandu iya. – TVS
