CARDIFF, 30 April: Inisiatif dagang kunsi entara perintah Sarawak nengah SMD Semicondutor Sdn Bhd (SMD) enggau kaban strategik ari United Kingdom (UK) terus ngayanka pemansang ke alai bala tuai industri nya madahka kerejasama tu sebagi ari siti model inovasyen teknologi ti meri pangka ke besai.
Tuai Pegawai Eksekutif CSA Catapult, Rah Gawera muji penyikar enggau pemansang ke manah ti dijapai semina dalam timpuh setaun pengudah kedua-dua raban nyain sempekat pemereti ati.
“Dalam industri kami, pengelaju tu beguna amat.
“Nya alai tu ukai semina numbuhka inovasyen, tang mega nambahka tikas pemujur pengawa ngagai tikas komersial, ngasilka dalam kuantiti pemansut komersial sereta nemu pemar ke bendar dalam bejalaika teknologi ba luar,” ku iya madah.
Iya bejaku munyi nya rambau aum media pengudah pra ngelancharka KETEQ AI enggau pengawa betukar dokumen sempekat kerejasama strategik enggau SMD ba CSA Catapult di Cardiff United Kingdom, Hari Dua tu tadi.
Ku iya madah, aspek ke beguna amat dalam kerejasama tu ukai semina mekuhka ngagai pansik aja, tang mega pemereti senentang pemar lebuh bekenaka teknologi.
Nangkan ke nya, Penyanding Penemu Saintifik Besai Opis Dagang enggau Pengawa Dagang UK, Profesor Julia Sutcliffe, kerejasama Sarawak enggau UK dalam pemansang teknologi jemah meri pangka ke besai.
“Chukup ngemegahka ati meda tikas inovasyen enggau kerejasama baka tu dalam bidang teknologi .
“Kami deka ngelancharka strategi industri kami ujung taun tu lalu semikonduktor dalam sektor digital enggau teknologi tu beguna amat ngagai strategi nya sereta perambu kami dikena nyapai pengerembai ke manah,” tandu iya.
Kerejasama rat nya bisi daya nentuka kedua-dua menua ba dalam penuduk ke tegap nyungkak pemansang ekonomi jemah.
Pia mega nengah kerejasama nya mega nyukung perambu Sarawak nyadi pengerandang ngasilka chip pintar enggau teknologi kuasa beresi, sereta projek pemansang Edge AI Power Converter ke dipelaba muka markit baru di Eropah, Asia Tenggara enggau Amerika Syarikat.-TVS
