CARDIFF, 30 April: Chip Pintar bepelasarka Pemintar Artifisyel (AI) ti dikemansangka SMD Semiconductor Sdn Bhd (SMD) dipeda ngembuan potensyel nyadi penyungkak besai transformasyen sistem grid kuasa enggau industri automotif dunya.
Tuai Pegawai Eksekutif SMD, Shariman Jamil madahka, teknologi Edge AI Power Converter iya nya siti inovasyen disruptif ke deka mutarka isu kritikal baka penanggul bekal elekterik, ngena kuasa ke tinggi sereta sistem motor elekterik ke lebih efisyen.
“Tebal agi dalam sektor automotif enggau kuasa ke ulih dikemaru, ambika banding, teknologi tu beguna amat dikena nentuka sistem grid kitai nyadi lebih tegap enggau bisi daya tan. Kelimpah ari nya, tu mega relevan dalam semua sistem penyungkak motor.
“Enti beratika penyampau semua kuasa ke dikena ba dunya diatu, kurang lebih 50 peratus ari nya dikeluarka ngena motor. Nya alai enti sema kitai ngembuan chara mutarka tu sechara inovatif ke baru dikena nyadika motor lebih efisyen lalu udah nya ngurangka ngena kuasa, tu mih sebengkah teknologi disruptif ke benung dianti dunya,” ku iya madah.
Iya madah munyi nya rambau pra ngelancharka Teknologi Edge AI Power Converter ti dikelala enggau nama KETEQ AI di CSA Catapult, Cardiff, Hari Dua tu tadi.
Ku Shariman madah, pengelebih SMD enti dibanding pengemeran industri ke bukai iya nya pengulih nyengulai sama daya AI sechara terus ke dalam chip tu empu, ke ukai semina ba renggat sistem luar aja.
Iya nerangka, endang beguna bendar pemisi teknologi ke baka tu lebih agi krisis kuasa ke benung nuntung sekeda menua maju baka Sepanyol enggau Portugal ke napi penanggul bekal elekterik.
“Penanggul bekal tu ulih ngujungka pengerugi bejuta dolar Amerika ninting hari laban nadai bekal elekterik.
“Nya alai, nama ke ulih dipelajar kitai ari situasyen ke baka tu? Tu mandangka kitai begunaka teknologi grid baru ke lebih tegap enggau tan. Tu siti ari chunto teknologi ke benung dikemansangka kami diatu,” tandu iya.
Pemansang chip tu diatu ba renggat tumu lalu SMD melabaka timpuh satu tauka dua taun sebedau chip nya sedia dijual penuh ti naga deka rembus ngagai markit UK, Eropah, Amerika Syarikat enggau Asia Tenggara.
SMD mega andal teknologi tu deka muka markit baru, seraya mai pemansang ekonomi enggau numbuhka peluang bakat di Sarawak.-TVS
