MUKAH, 28 April: Pengawa ngatur Pesta Kaul Mukah 2025 ukai semina ngintu pemanah lanting budaya bansa Melanau, tang mega nyadika pelasar ti chukup beguna dikena negapka ekonomi komuniti lokal.
Sapit Menteri Ekonomi, Datuk Hanifah Hajar Taib madahka, Pesta Kaul udah muka peluang besai ngagai perayat lokal ngasilka penatai pemisi nengah chara meri kelala produk ba pengawa ngatur achara baka ruai alai bejual.
“Nya alai, komuniti lokal mesti nguna peluang tu enggau manah. Kami ngarap mayuh agi temuai ari luar kandang menua Mukah deka datai ngagai Pesta Kaul tu,” ku iya.
Iya madah munyi nya lebuh bejaku ba Pengerami Keman Kaul Mukah beserimbai enggau Pesta Kaul Mukah 2025 ba Panggau Besai Taba Kaul Mukah, Tasik Kala Dana kemari.
Hanifah ke mega Kaban Parlimen Mukah meri terima kasih ngagai Opis Menteri Dagang Temuai, Industri Kreatif Enggau Seni Pemerindang Sarawak ke udah meri sukung nengah geran dagang temuai ti ngemujurka Pesta Kaul Mukah 2025 diatur enggau lebih richah sereta meri empas ke tinggi.
Pesta Kaul Mukah taun tu mega nerima penyereta ti aktif ari mayuh bengkah agensi perintah, NGO enggau serikat peribit ti mandangka komitmen dalam ngemansangka ekonomi lokal seraya nyaga lanting budaya Melanau.-TVS
