KUCHING, 28 April: Projek Jematan Batang Rambungan Lundu disadang tembu bulan Julai 2026, ku Datuk Amar Douglas Uggah Embas.
Sapit Premier Sarawak nya madahka, kunteriktor penyelamat ti udah bejalaika projek nya dipeda bepenau ulih nembuka projek tumu agi ari timpuh ke udah ditetapka.
“Tadi kitai udah baum enggau kitai beratika ba keterubah, kompeni tu kompeni ke manah.
“Aku andal sida ulih nangkup projek laban ari sukut material ke diguna sigi udah bisi ba ditu semina kabel aja bedau datai. Pekereja pan bisi.
“Aku beratika sekeda kerja pan udah dipejalaika enggau naka diatu udah nyapai 2.7 peratus tumu agi ari timpuh asal.
“Nya alai, sehari tu kitai minta sida nusun baru pelin kereja ngambika jematan tu ulih ditembuka manggai Julai 2026.
“Kunteriktor setuju nembuka projek nitihka timpuh ke dipinta kitai. Sida tu bepeneleba enggau mayuh pekereja.
“Semua barang ngaga projek bisi ditu enggau semina nganti kabel aja,” ku iya.
Iya mansutka jaku nya rambau matau pemansang Projek Jematan Batang Rambungan, di Lundu sehari tu tadi.
Uggah ke mega Menteri Infrastruktur Enggau Pemansang Palan Penyangkai Kapal nerang, naka tu projek nya tujuh peratus tembu dulu agi ari timpuh ke udah ditetapka.
“Jematan tu enda panjai, 560 meter. Jematan Batang Lupar 4.8 kilometer. Jadi kitai amat ngarap enggau besampika gaya hari manah laban nya siti ari faktor ke ulih ngeruga kereja ngaga projek,” ku iya.
Projek ti berengkah kena 17 Disember 2019 nya ditimpuhka tembu 16 Disember 2022, taja pia projek nya napi pengelaun ketegal sekeda faktor baka kurang pekereja enggau chara bejalaika sereta enda ulih tembu nitihka timpuh ti ditetapka.
Udah nya, projek diserahka ngagai kunteriktor penyelamat ti udah ngepunka kereja ngaga jematan nya baru kena 19 November 2024.
Projek Jematan Batang Rambungan Lundu iya nya sebagi ari projek jalai pesisir Sarawak.
Sama bisi datai, Sapit Menteri Infrastruktur enggau Palan Penyangkai Kapal, Datuk Aidel Lariwoo sereta Direktor JKR Sarawak, Dr Cassidy Morris. -TVS
