KUCHING, 24 April : Pasukan Gerakan Am (PGA) Briged Sarawak bisi ngerampas bemacham barang dibai belalai nyengkaum manuk sabung lalu semua nya berega RM3.5 juta nengah Op Taring Alpha enggau Op Taring Awas ke dipejalaika kenyau bulan siti nyin kemari.
Komander PGA Briged Sarawak SAC Dr Che Ghazali Che Awang madah, ba sebengkah operasyen kena 23 March ba Limbang, raban sida ngetan siku lelaki lokal beumur 58 taun di sebuah premis ke nyadi palan nyimpan segerit nadai chukai kastam.
“Asil peresa silik mega tetemuka bisi 3,400 karton segerit burak bemacham chap ditaruh dalam kerita ti paking ba premis nya.
“Bela dirampas sebuah entukar iya nya van lalu semua nya berega RM1.77 juta,” ku iya nengah sebengkah penerang ditu, sehari tu tadi.
Che Ghazali madah nengah operasyen kena 19 March ke dipejalaika ba Lundu, iya nya ba adan menua Sarawak-Indonesia, PGA bisi ngetan siku lelaki lokal beumur 53 taun nguji nabanka enam tan berau ngagai menua sepiak nyengkaum sebuah entukar ke berega RM221,600.
Udah nya kena 23 March di Engkilili, iya madah PGA bisi ngetan 10 iku lelaki peranak lokal beumur antara 35 nyentuk 78 taun ba sebuah kelang nyabung manuk.
“Tujuh iku manuk sabung enggau bemacham kereban dikena bejudi sereta sebuah entukar bela dirampas enggau ungkus semua RM154,450,” ku iya.
Ba operasyen ke dipejalaika kena 21 March tu tadi ba Lubok Antu, Che Ghazali madah PGA bisi ngetan dua lelaki rayat Indonesia beumur 43 enggau 47 taun ba sebuah endur ke nadai digazet.
“Asil pansik tumu bisi tetemuka 152 kilogram produk pemakai udah diais ditaruh dalam kerita MPV lalu penyampau semua barang ke dirampas manggai RM104,607,” ku iya.-TVS
