BAU, 24 April: Dua iku bebadi nyawa aksiden ngaul sebuah kerita enggau lori di Jalai Serikin, simpang nuju ke Kampung Stass ditu sehari tu tadi.
Tua Balai Bomba enggau Penyah Penusah (BBP) Bau, Zainuddin Ngatdemon madah, ba penusah nya tudah lelaki ke bebadi nyawa iya nya Nathaniel Joehensern Jiway Abdullah, 32, penumpang duduk ba luan, lalu siku penumpang indu ba penuduk belakang ke bebadi nyawa apin dikelala nama.
Ku iya, raban sida nerima kangau bekaul enggau kes tu pukul 10.06 pagi lalu ngerah lima iku raban BBP Bau ngesah palan penusah.
“Penusah aksiden nya ngaul kerita perodua Kancil enggau sebuah lori.
“Bisi empat iku semua sida ke bebadi iya nya tiga iku nepan perodua kancil tekepit, udah nya siku orang ba dalam lori nadai nama-nama lalu mujur dipansut ari kerita,” ku iya nengah sebengkah penerang sehari tu tadi.
Ku tandu iya, raban bomba bekenanas mansutka tiga iku tudah sida ke tekepit ngena kereban khas.
“Tudah ti keterubah mujur dipansutka iya nya siku lelaki besai tuai (bakal) iya nya deriba kerita udah dikatung ngagai ambulans Opis Menteri Pengerai (KKM) lalu dibai ngagai Sepital Bau.
“Dua iku agi tudah ke bebadi nya siku lelaki besai tuai enggau siku indu besai tuai dikenuku raban perubat KKM udah nadai ba palan penusah nyadi,’ ku iya.
Ku iya, deriba lori ke beumur 36 taun nya semina bakal mimit bekau ari penusah nya.-TVS
