MIRI, 19 April: Operasyen Ngiga enggau Nyelamat (SAR) tudah ke lemas pengudah entukar 4Wheel Drive (4WD) ke ditepan sida rarat ditabanka arus deras lebuh nguji meraka Sungai Sengayan, Long Jekitan, Ulu Baram, diketu pengudah bangkai niang Dawellies ditemu lemai kemari.
Pengari Palan Gerakan Operasyen Opis Bomba enggau Penyelamat Malaysia (JBPM) Sarawak madahka, tubuh niang Dawellies Luing, 46, ditemu urung pukul 2 lemai kemari ba Sungai Sengayan maya hari keempat SAR dipejalaika.
“Bangkai tudah ditemu penyauh tujuh kilometer ari palan penusah nyadi lalu udah diserah ngagai polis.
“Udah nya, tudah dibai ngagai Sepital Miri ungkup pekara bekaul,” ku iya.
Operasyen SAR tembu penuh urung pukul 8 malam kemari.
Nangkan ke nya, bangkai anak tudah iya nya Vallerie Mentie Dawellies, 9 taun ditemu pengani genturung pendiau lalu dibai ngagai rumah sida sebilik di Long Tikan kena Hari Tiga tu tadi.
Dalam penusah ke nyadi urung pukul 8 pagi, sida Dawellies menyanak nyengkaum bini enggau anak indu iya bisi nepan sebuah entukar ke dibai siku pengani lokal.
Lebuh deka meraka Sungai Sengayan, injin entukar sida tama ai ngujungka injin mati lalu udah nya sida bela ditabanka arus deras.
Deriba enggau bini Dawellies mujur nyelamatka diri.-TVS
