BINTULU, 19 April: Dua iku bebadi nyawa ba penusah aksiden ti mungkur dua buah entukar ba mua lampu trafik Paragon ditu, malam tadi.
Komander Operasyen, Sat Rawing madahka, raban iya nerima ripot bekaul enggau kes nya urung pukul 11.54 malam lalu ngerah 10 iku kaban Balai Bomba enggau Penyah Penusah (BBP) Bintulu ngesah palan penusah nyadi.
“Lebuh datai ba palan penusah nyadi, ditemu bisi penusah aksiden nyadi ti ngaul dua buah entukar iya nya sebuah kerita Toyota Hilux enggau sebuah kerita Proton Saga.
“Bisi empat iku mansa, siku lelaki besai tuai enggau tiga iku indu besai tuai dalam entukar Proton Saga. Dua iku tudah indu beumur 34 enggau 44 taun ke tepekul ditukuka bebadi nyawa seraya dua iku agi ke bukai mujur dipansutka mensia mayuh,” ku iya.
Ku terang iya, dua iku tudah ke bakal dibai berubat ngagai sepital seraya deriba kerita Toyota Hilux nadai napi sebarang bakal.
“Dua iku tudah ke bebadi nyawa nya diserah ngagai polis ungkup pekara ke bekaul,” ku iya.
