KUCHING, 14 April: Bisi sekeda orang engka ngumbai indai tunggal tu individu ti lemi tauka enda ulih ngatur pengidup diri empu laban sida patut ngesan tanggungpengawa ti besai iya nya nyadi indai enggau apai dalam sesiti maya.
Tang, ungkup siku indai ke benama Cici, tu ukai nyadi siti penanggul ngagai iya dikena neruska pengidup enggau manah.
Taja pan napi pemar ngemesaika tiga iku anak iya kediri, iya tetap nguji ngiga belanja nengah pengawa bedagangka manik ti nyadi asil penatai pemisi sida sebilik.
Maritza Britten, beumur 42 taun, tauka dikelala enggau nama cici berengkah dalam dunya bidang kraf manik kenyau umur iya 30-an suba.
Ku iya madah, indai iya nyadi inspirasyen iya dalam ngerembaika pengerindu iya ba pengawa kraf manik.
Cici ngena awak lepa iya enggau manah dikena belajarka chara sereta nguasa teknik ngaga manik.
“Aku berengkah ngaga pengawa tu ari indai aku. Indai aku udah lama ngadu pengawa tu. Iya ngadu kediri enggau ngajar urang mega. Sekumbang aku nyadi indai tunggal tu, aku tusah deka ngiga pengawa. Nyadi aku belajar ari indai aku ngadu (manik). Berengkah ari nya sampai mih ke diatu aku ngaga pengawa tu.
“Lebuh maya lepa, aku belajar. Belajar ngadu utai tu (ngaga manik). Lebuh aku belajar enggau ngaga manik tu, pia mega aku ulih nyual iya, ” ku iya lebuh dirandau TVS di Kuching.
Lebuh maya ujung minggu, bala anak Cici mega bisi mantu sereta nyaup iya begagaka manik enggau sekeda asil krafjari.
Cici mega bisi muka ‘Booth” alai bedagang manik enggau krafjari iya ba Cityone Megamall, Kuching ti dibuka ninting hari.
Kelimpah ari bedagangka manik, Cici mega ngasilka sekeda bansa kraf baka tangu, sembun enggau pangih.
Krafjari iya ukai semina nerima peminta ari komuniti lokal aja, tang orang ari menua luar mega ngerinduka asil keranjai jari Cici.
Ngelansa pasal penatai pemisi ari pengawa bedagang manik tu, cici madahka asil ari pengawa nyual manik tu endang meri penguntung seraya ulih ngasilka penatai pemisi dikena melanja sida diri sebilik.
“Asil ari penatai pemisi tu endang meri penguntung. Puji Tuhan, aku agi ulih melanja indai enggau bala menyadik aku.
“Pekara ke paling begunat amat iya nya aku ulih melanja bala anak aku enggau ulih nammpung utai ti diguna sida besekula,” ku iya.
Taja pia, iya mega ngaku pengawa bedagang manik tu enda muntang.
Entara pemar ke ditapi iya, iya nya kuasa makit entara pedagang kraf ti majak nambah.
Taja pan betapi enggau bemacham pemar, iya mega enda mudah putus pengarap lalu sukung ke diberi sida sebilik meri peransang ngagai iya dikena neruska pengidup enggau manah.
Sukung ti diberi sida sebilik mega mantu iya angkat dalam pengidup lalu iya enda ngelakka semua pemar nya ngelemikka semangat iya.
Berindik ari nya, iya mega meri pesan ngagai orang ba luar din, tebal agi indai tunggal ngambika enda mudah putus pengarap sereta terus nyingkang ke mua ngambika ulih mujur dalam pengidup jemah.
“Anang jampat putus pengarap sereta anang mendingka jaku orang bukai ti deka ngemaruhka kitai.
“Kelimpah ari nya, anang ngasaika diri enda ulih ngadu sebarang pengawa. Belajar aja. Enti enda nemu nanya orang. Laban kitai enda nemu baka ni pengidup kitai jemah ila,” ku iya.
Taja pan betapi enggau bemacham penusah, iya tetap bebendar gawa sereta ngiga belanja dikena nupi sida sebilik.
Nya alai, tu mega ngingatka kitai, nadai utai ke enda ulih digaga dalam pengidup, enti kitai bisi pengeransing ati sereta enda mudah putus pengarap.-TVS
