KAPIT, 5 April: Menteri Kereja Raya Dato Sri Alexander Nanta Linggi udah ngelalau raban Opis Kereja Raya (JKR) masang papan tanda ba kandang endur tanah tusur lebih agi ba Jalai Raya Sibu-Kapit.
Ku iya, pekara nya dikena nentuka pengelikun mensia mayuh ke nengah jalai nya nyerumba pengerami Gawai Dayak ke deka datai.
“Sehari tu aku bisi nurun gawa ngulu Aum Pasal Ripot Tasah Musin Landas (MTL) ba Opis Pelilih Song.
“Bepelasarka ripot ke dibantai Pegawai Pelilih Song, Harry Bruce Edwin bisi 14 kandang endur sereta 104 iku raban udah dipindah bekau ari penyadi ampuh bah ke nuntung (Kapit) kenyau 21 nyentuk 23 March tu tadi,” ku iya nengah sebengkah penerang ke dipansut ba laman Facebook rasmi iya sehari tu tadi.
Nangkan ke nya, Nanta madah bisi enam buah sekula nyengkaum Sekula Primari (SK) Nanga Beguang, SK Nanga Temalat, SK Lubok Bedil, SK Nanga Janan, SK Nanga Nansang enggau Sekula Sekondari (SMK) Katibas tebunsa ketegal penusah ampuh bah nya.
Bepelasarka ripot penuh mega, urung 1,500 perayat tebunsa ketegal ampuh bah tang mayuh sida enggai pindah ngagai palan pengenduh (PPS) ampuh bah.
“Nama pekara ke dikemerat diatu iya nya, aku deka nentuka pengawa ngaduka baru tebiang enggau kandang tanah tusur ba Jalai Sipan/Temalat bejalai enggau lanchar sereta dirumban.
“Tanah ti balat tebiang enggau tanah tusur ba Jalai Sipan/Temalat nengah perambu diadu baru bela beungkus manggai RM2 juta enggau RM5 juta, patut dipejalaika lengkas,” ku iya.
Tandu Nanta, taja pia jalai nya dibaruh bidang kuasa Perintah Nengeri lalu pekara ke pemadu berat diatu jalai nya mesti dikemanah lengkas dikena nentuka pengelikun mensia mayuh ti deka ngintu pengerami Gawai Dayak.-TVS
