KUCHING, 5 March: Projek ngaga Jematan Sejingkat ti nyambung sungai Sarawak disadang tembu nitihka timpuh ti udah ditetapka, ku Datuk Dr Hazland Hipni.
Sapit Menteri Kuasa enggau Pemeruan Rampa Menua Sarawak nya madahka, naka ke diatu pemansang projek nya udah manggai 70 peratus digaga lalu dijangka deka tembu ujung taun tu.
“Aku mega beterima kasih ngagai perintah laban udah meri mayuh bengkah projek besai ba kandang menua Demak Laut lebih agi Jematan Sejingkat Tanjong Bako ti nyau deka tembu.
“Engka deka tembu dalam bulan Disember taun tu, pia mega projek penyangkai kapal tasik dalam di Tanjung Embang lalu udah nya projek padang bilun baru mega di Tanjung Embang.
“Pemansang naka ke diatu iya nya 60 nyentuk 70 peratus dipelaba tembu dalam bulan Disember taun tu,” ku iya rambau Pengerami Rumah Tebuka Aidilfitri ke diatur iya di Kuching, Hari Enam.
Nengah penembu jematan nya ku iya, tu deka ulih ngemuntang tauka ngemandakka agi timpuh pejalai ari Samarahan ke Kuching.
Jematan pemanjai 1.28 kilometer enggau peninggi 26 meter ari tikas ai sungai nya nelan kos lebih RM360 juta.
Kelimpah ari nya, ku iya, bisi empat bengkah projek rumah ulih di empu ungkup rayat ba kandang menua nya ke diatu benung dipejalaika sereta bejalai enggau lanchar.-TVS
