SIBU, 5 March: Juluk ngaga jematan baru di Sibu bechuanka ‘London Bridge’ deka nyadi nyata pengudah perintah sarawak setuju ngungkupka turu dikena ngemujurka juluk nya.
Premier Sarawak, Datuk Patinggi Tan Sri Abang Johari Tun Openg madahka Perintah Sarawak ngemendarka peminta bagi ngaga jematan ikonik baru nya ti deka nyambung Sibu West Bank enggau mengeri  Sibu.
“Kitai (Perintah Sarawak) deka ngiga belanja dikena nentuka pengawa ngaga jematan tu ulih dipejalaika,” ku iya.
Iya mansutka pekara nya rambau Pengerami Ramah Tamah Aidilfitri Tuai Pemegai Menua Nengeri Sarawak enggau Premier Sarawak ti diatur di Dewan Canselor Tun Abdul Taib Mahmud, Universiti Teknologi Sarawak (UTS) Sibu kena Hari Lima.
Sama bisi datai ngulu pengerami nya iya nya Tuai Pemegai Menua Nengeri Sarawak, Tun Pehin Sri Dr Wan Junaidi Tuanku Jaafar enggau bini iya Toh Puan Datuk Patinggi Fauziah Mohd Sanusi.
Ku terang Abang Johari, pemisi jematan nya ila deka ngubah rampa pemansang di bagi menua Barat Sibu ngambika peluang ekonomi di sitak nya ulih ngerembai enggau meri pemaik ngagai peranak lokal
Dulu ari tu, Sapit Menteri Pelajar, Inovasyen enggau Pemansang Bakat Sarawak ke mega Kaban Kunsil Nengeri (ADUN) Nangka, Datuk Dr Annuar Rapaee madahka proses milih taba ti dipejalaika Opis  Kereja Raya (JKR) diatu ba renggat kepenudi sebedau diputuska.-TVS
