TATAU, 5 April: Perintah Sarawak terus mandangka komitmen dalam ngemansangka menua pesisir nengah bemacham inisiatif dikena nentuka pengelantang rayat terus dikemeratka.
Menteri ba Opis Premier Sarawak, Dato Sri John Sikie Tayai nyemetak madahka , Perintah Sarawak ba baruh iring Premier Sarawak, Datuk Patinggi Tan Sri Abang Johari Tun Openg enggau naka ulih nentuka guna enggau pengelantang rayat terus dijaga manah.
Nengah sebengkah penerang ba laman Facebook, John Sikie ke mega Kaban Kunsil Nengeri (ADUN) Kakus madahka, perintah benung chakah ngemansangka perengka guna pemun baka jalai raya, bekal ai enggau elektrik sereta mega rentayan komunikasyen ke manah agi ba menua pesisir.
“Entara sukut ke diberi perati iya nya perengka guna pemun baka jalai raya, bekal ai enggau elekterik, kelimpah ari negapka komunikasyen ke manah agi,” ku iya.
Iya madah munyi nya rambau Program Mangkung Tiang ke diatur ba Rumah Andrew Jaraw Nanga Belawit, Ulu Anap, Takan di Tatau, Hari Lima tu tadi.
Nangkan ke nya, iya mega udah ngungkupka belanja sepenyampau RM42,000 ungkup pemansang komuniti ba Rumah Andrew Jaraw, Nanga Belawit, Ulu Anap, Takan di Tatau.
Ku terang iya, tu dikena mantu Komiti Pengelikun enggau Pemansang Genturung Pendiau (JKKK) enggau Biro Indu bejalaika mayuh bengkah aktiviti pemansang komuniti enggau orang indu ba rumah panjai nya.
“Kelimpah ari nya penyampau RM12,000 deka diungkupka ngagai Komiti Pemansang enggau Pengelikun Genturung Pendiau (JKKK) rumah panjai nya sereta RM5,000 ngagai Biro Indu,” ku iya.
Beduduk enggaau nya, Kaban Parlimen Selangau, Edwin Banta mega bisi ngungkupka RM1,000 ungkup tetiap pintu rumah panjai, ti ngaul 12 pintu, lalu nyadika penyampau RM12,000 ngagai JKKK Rumah Andrew.
Udah nya, Biro Indu Rumah Andrew mega nerima agih belanja tambah sepenyampau RM8,000.
Edwin mega bisi ngungkupka agih belanja Projek Mit Menua Pesisir (MRP) penyampau RM5,000 ngagai 18 iku tuai rumah JKKK rumah panjai ke bisi datai maya nya.-TVS
