KUALA LUMPUR, 3 April : Pengawa ngerembaika Bantu Pemun Rahmah (SARA) ke berengkah Hari Dua tu tadi antara atur Perintah MADANI dikena ngelempungka tating belanja raban kurang pemisi enggau jelan pemesai diperati meri empas positif ngagai raban penerima.
Tebal agi sida mantaika pengaga ati enggau beterima kasih ngagai Perintah MADANI laban udah nambahka penyampau bantu nyentuk RM2,100 ungkup ruang bilik seranta enggau ke balat merinsa bepelasarka data e-kasih, dibanding RM1,200 taun nyin kemari.
Bantu SARA penyampau RM100 sebulan dikreditka ngagai MyKad penerima ungkup Januari nyentuk March taun tu enggau penyampau bantu nya ditambah RM200 sebulan berengkah 1 April tu tadi, ngaul 5.4 juta penerima, penambah nyau deka lapan kali lipat dibanding 700,000 penerima ke bisi diatu.
Di PERLIS, siku penerima ke mega gawa ba rumah Hawa Razak, 45, madah, penambah penyampau bantu SARA ulih ngelempungka tating belanja tudah laki iya ke gawa kediri dikena nupi sida sebilik.
“Aku bisi empat iku anak, enti bulih RM100 baka suba, deka pan enda milih barang ke pemadu beguna lebuh bebeli, tang ngena RM200 bisi laluh RM100 agi, nyadi ulih meli barang bukai,” ku iya.
Di JOHOR, siku orang lunggar umur Masnah Shamsudin, 68, ngasaika penyampau bantu ke udah ditambah endang setipak enggau gaya ekonomi diatu lalu orang tua nya nguna manah SARA dikena meli bekal ubat enggau barang bukai.
“Rega barang diatu nurun niki, aku semina ngandalka pinchin laki. Nyadi nengah bantu tu aku enda ibuh irau dikena meli barang dapur enggau ubat,” ku iya.
Di KELANTAN, siku indu gawa ba rumah Rosmarini Abdul Rahman, 44, madah bantu SARA ulih ngurang kos belanja niniting bulan dikena meri barang guna ninting hari sereta belanja sekula bala anak, kelimpah ngasaika inisiatif nya kelai komitmen perintah dalam nentuka pengelikun rayat.
Di PERAK, siku penerima baru bantu SARA, Intan Suraya Mohd Noordin, 50, madahka inisiatif nya ulih ngelimat sebagi ari kos belanja ngelama tu ke diguna ninting bulan dikena meli barang ungkup diri sebilik.
Ba penemu siku ex-misi Zaitun Abdul Rahim, 63, madahka, kelimpah ulih ngurangka tating belanja ninting bulan, pengawa meri bantu SARA ngagai MyKad mega ngemudahka pengawa bebelika barang nadai nguna mata duit.
Berengkah taun tu, pengawa meri SARA nengah MyKad mega diguna ba Sabah, Sarawak sereta Wilayah Persekutuan Labuan pengudah sebedau tu taun 2024 semina ngaul nengeri di Semenanjung.
Kelimpah meri terima kasih sereta puji bekaul atur ngerembaika inisiatif nya, siku agi orang gawa ba rumah di i Tuaran, SABAH, Laila Simbun, 46, ngarapka raban bekaul nyengkaum bala tuai genap genturung pendiau patut ngelala bagi nembiak redak ke ulih nerima SARA awakka sida enda tinggal nerima bantu nya.
Di SARAWAK, ba penemu Andrew Sibat, 33, madahka bantu SARA ngelempungka tating belanja dikena me;i barang dapur enggau barang sekula anak.
“Sebedau tu endang bisi bantu Pemun Kredit Rahmah (STR), ngumbai maya nya aja tang agi bisi bantu ke bukai. Pengasai ati (gaga) enda ulih sukat,” ku iya ti madah gawa kediri empu
Nengah program SARA, penerima uih barang pemun enggau rega ke dipilih ngena Mykad ba kedai renchit ke berejister lalu diatu lebih 1,200 ba selampur menua dibanding 700 kedai ba taun 2024.
Penerima SARA ulih nguna kredit nya dikena meri barang pemun ke dipilih bepelasarka kategori baka barang dikena mandi, ubat-ubat enggau kereban sekula kelimpah barang pemakai pemun.-TVS
