SARIKEI, 27 Mac: Jematan Batang Rajang, Jalai Pasi ti udah dibuka ngagai mensia mayuh sehari tu ngemandakka timpuh pejalai entara Sarikei enggau Tanjung Manis, ku Datuk Amar Douglas Uggah Embas madah.
Iya ke nyadi Sapit Premier Sarawak madahka, pemisi jematan nya diatu ukai semina dikena ungkup timpuh dua minggu aja, tang ulih terus dikena.
Beduduk enggau nya, iya meri pengaga ati ngagai semua pengari rayat di sitak nya laban udah bisi jematan baru ke tau nyadi pematak jalai ngagai pemansang sosioekonomi ba kandang menua nya.
“Terima kasih Premier Sarawak, Datuk Patinggi Tan Sri Abang Johari Tun Openg ti udah meri agih dikena ngaga Jalai Pasi pemanjai 17 kilometer enggau sebuah jematan ti ngena kos penyampau RM321.2 juta.
“Diatu di Sarawak mayuh jematan udah dibuka. Bisi sekeda projek jematan nyauka tembu digaga dalam taun tu.
“Ambika chunto, Jematan Batang Saribas 1, Jematan Batang Lingga, Jematan Batang Lupar 1, Jematan Limbang, Jematan Batang Igan, Jematan Sebauh enggau Jematan Sejingkat (kesemua tujuh jematan nya dikearapka ulih tembu taun tu),” tandu iya.
Uggah ke mega Menteri Infrastruktur enggau Pemansang Penyangkai Kapal nerangka, dalam taun baru bisi beberapa jematan ditaga tembu nyerangkung Jematan Batang Paloh, Jematan Batang Krian, Jematan Batang Lupar 2 sereta Batang Saribas.
Iya madahka, bisi 16 jematan ti digaga ba baruh Perintah Sarawak, lalu empat udah tembu digaga.
“Dalam timpuh setaun 11 projek jematan tembu digaga. Semua jematan tu digaga ngena agih tauka turu Sarawak seratus peratus,” ku iya madah. – TVS
